Ministru Justisa, Manuel Cárceres da Costa. Imajen/Egas Cristóvão

DILI, 02 juñu 2020 (TATOLI) – Ministru Justisa (MJ), Manuel Cárceres da Costa hateten, ho rekursu númeru juiz aumenta sei haforsa serbisu iha tribunál sira.

Notísia Relevante : PTR Fó Posse ba Juiz Na’in-Haat

“Ita hotu  sai testemuña tomada posse juiz Administradór Oe-cusse ho Juiz foun na’in-tolu, ohin, aumenta ita-nia rekursu hodi fortalese no haforsa setór judisiáriu iha tribunál sira,” afirma Ministru Manuel Cárceres da Costa, bainhira partisipa iha serimónia posse ba juiz Timoroan na’in-tolu ho mós Juiz Administradór Tribunál Oe-Cusse  iha Tribunál Rekursu, Dili, tersa (02/06/2020).

Ministru Justisa Manuel Cárceres da Costa, lori governu nia naran kongratula ba juiz foun sira no agradese ba sira hotu fó ona vida atu eskolla profisaun hanesan juiz.

Ministériu Justisa, Manuel Cárceres hateten, kontinua aposta nia programa hodi fó apoiu iha setór justisa espesialmente iha tribunál atu oinsá lori justisa ne’e hakbesik ba povu.

Hatán kona-ba kazu pendente kontinua eziste iha tribunál sira, Manuel Cárceres da Costa dehan, sukat ba rekursu sira iha tribunál sei limitadu kompara ho kazu ne’ebé loron ba loron aumenta. Tanba ne’e, fanun sosiedade atu evita sidadaun sira halo krime.

Husi sorin seluk, Prezidente Tribunál Rekursu (PTR),  Deolindo dos Santos informa, daudaun ne’e iha Tribunál Rekursu iha Juiz na’in-haat (4), Tribunál Distritál Baucau nain-hitu (7), Tribunál Distritál Suai na’in-hitu (7), Tribunál Distritál Dili na’in-10 no Tribunal Oe-cusse na’in-rua (2).

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here