Hakerek nain, Renato da Costa.

Hosi:

Renato da Costa

Rekoñese katak diversa natureza no karater pesoál ema idak idak nian iha instituisaun no mós diferensia nesesidade kona-ba komúnikusaun abordajen vitál tebes. Tanba ne’e, prezensa artigu ne’e nu’udar feramenta hodi apoiu ba avaliasaun servisu komúnikusaun iha instituisaun sira, liuhosi fornesimentu orientasaun no ezemplu inklui mós boa prátika iha área servisu komúnikusaun nian, liuliu kona-ba prosidementu estabelesimentu portavós bainhira instituisaun tama iha faze krize komúnikusaun ho dalan própriu atu informa ba ninia kliente ou públiku en jerál.

Artigu ne’e hato’o rekomendasaun ho nia leitura ba nivel hirarkia hodi hatene vizaun jerál no mós objetivu ba servisu iha área  komúnikusaun nian. Artigu ne’e kobre iha área ne’ebé mais krítika hosi komúnikusaun iha INSTITUISAUN nian bazea ba esperénsia institusionál ne’ebé mak liu ona. Konsidera katak, INSTITUISAUN nu’udar aparellu públiku presiza hamosu nia estratéjia no planu  komúnikusaun hodi hamosu uniformiza sistema deziminasaun informasaun ba liur, nune’e mós ba iha nivel instituisaun laran.

Nu’udar buat ne’ebé ita hotu hatene katak kada instituisaun atu nia instituisaun governu ou privadu iha misaun e vizaun no meta ho objetivu ne’ebé tenke alkansa, no laiha instituisaun bele atinje ninia objetivu, se instituisaun ne’e deskoñesidu ou izoladu, eseptu ba instituisaun ilegál. Hodi bele estabelese relasaun ne’ebé armonia ho váriu grupu iha instituisaun laran no mós boa relasaun ba liur, sertamente no nesesidade duni ita presiza medida própriu, hodi mantein  relasaun armonioza ho polítika ne’ebé mak iha ba interese  instituisaun nian.

Hodi dezempeñu funsaun hirak ne’e, pais barak iha mundu ohin laran aplika utiliza portavós ne’ebé reprezenta  instituisaun la’ós atu ko’alia ho esplikasaun no konfigurasaun ne’ebé mak iha, mais ho funsaun  serbisu hodi asegura relasaun di’ak no armonia, iha instituisaun laran no mós ho entidade esterna. Pesoál ne’ebé nomeadu atu sai portavós, refere tebes ba iha pesoál ne’ebé hatene tebes maneira komúnikusaun ho públiku, familiarizadu ho polítika no meta instituisaun nian ne’ebé atu alkansa. Hodi nune’e bainhira portavós ko’alia sai ba públiku nia hatene oinsá atu lori informasaun ne’ebé loos ba públiku hodi hamosu konfiansa hosi públiku rasik.

Rekoñese mós katak, portavós  nu’udar pessoa konfiansa hodi reprezenta sistema jestaun no instituisaun nian. Palavra ou komportamentu não-verbal hosi portavós sempre iha influénsia ba persepsaun públika kona-ba instituisaun refere. Públiku sei hala’o reasaun mais  rapidu, ho proporsionandu ho nia avaliasaun tomak kona-ba buat ne’ebé sira rona hosi portavós refere.

Reasaun hosi públiku sei mosu, por kauza iha relasaun no interasaun entre  instituisaun ho várius komponente inklui públiku rasik. Iha kada interasaun, komponente interesadu hotu ​​presiza  informasaun ne’ebé transparente, klara sobre instituisaun refere ninia aktu ba problema ruma.

Kuriosidade hosi parte interesada no públiku sei mais aumenta kuandu  instituisaun refere enfrenta hela problema balun. Às vezes, tanba ita taka informasaun, parese tanba laiha portavós, sei akontese variedade  rumór (boatos) sobre  instituisaun refere. Iha situasaun hanesan ne’e mosu kedas krize komúnikusaun tanba públiku hahú duvida ba polítika ne’ebé mak espalla iha sira nia leet. Tanba, faktu instituisaun, konstantemente sempre iha interasaun ho  ambiente balun ne’ebé daruma ladun favoravel hosi atividade ne’ebé mak hala’o iha terenu. Ho nia konsekuénsia lójika, interasaun hirak ne’e sempre hamosu konflitu ho várias formas. Situasaun hirak ne’e bainhira laiha medida kanalizasaun informasaun ne’ebé mak loos no klara, sei rezulta rumoris no boatus hodi estraga instituisaun ne’e rasik.

Refere ba papel  portavós hosi instituisaun nian, barak mak bazea ba pozisaun ou funsaun iha  instituisaun laran. Ho ninia razaun no konsiderasaun úniku, tanba kestaun atu influénsia ba iha opiniaun públiku. Mas iha instituisaun balun nomeiasaun atu sai  portavós, la’ós bazea ba pozisaun estruturál.

Tanba papel portavós hala’o mós funsaun nu’udar kanalizadór informasaun ba públiku ne’ebé fora hosi instituisaun (públiku).  Informasaun ne’ebé  fornese hosi portavós ninia artikulasaun ikus mak asegura kredibilidade hosi instituisaun ne’e rasik. Portavós mós tenke asegura informasaun ba públiku kona-ba instituisaun nia lalaok hodi derije no rezolve problema ne’ebé mak instituisaun ne’e enfrenta.

Rekezitu fundamentu saida mak presiza atu estabelese, bainhira instituisaun Estadu hakarak indika pesoál portavós. Nesesita tebes pesoál ne’e iha  relasaun kona-ba koñesementu problema. Portavós idealmente, pesoál ne’ebé domina problema ho apoia hosi dadus no faktu nu’udar elementu prova. Atu nune’e, antes atu transmite informasaun ba públiku, portavós hatene tiha ona kontekstu hosi situasaun refere ho kompletu hosi problema ne’ebé mak akontese iha instituisaun  laran.

Tuir fali portavós tenke konvense inadekuadu, hosi informasaun ne’ebé mak tenke aprezenta ba públika, nune’e mós portavós tenke hatene ida ne’ebé mak labele atu aprezenta. Fornesimentu  informasaun sira ba públika  hosi portavós tenke  asosiadu ho  lejislasaun ne’ebé pertinente no eziste iha instituisaun laran.

Ikus liu portavós tenke iha  kapasidade hodi  rezolve informasaun hirak ne’ebé mak iha hodi bele hato’o ba públiku liuhosi nivel konsultasaun másimu ho lideransa instituisaun nian. Por-ezemplu, informasaun sira kona-ba  kestaun téknika, portavós presiza ema ne’ebé iha koñesementu kle’an hosi kestaun téknika atu bele akompaña portavós, nune’e labele hamosu espekulasaun iha públiku.

Importante katak, portavós la’ós atu hato’o deklarasaun pesoál. Portavós onestamente nu’udar espellu ba atitude instituisaun nian, mesmu buat hirak ne’ebé portavós hato’o kontra atitude própria ho nia perspektiva tomak. Portantu, atu sai portavós la’ós por-kauza tanba ninia persisténsia  eselente, liuliu iha debate públika, mas jeralmente tanba dezempeñu ho impresionante hodi asegura  instituisaun nia imajen ba públiku.

Instituisaun moderna ohin loron, ultrapasa dezafiu hirak ne’ebé mosu iha terenu hodi hamosu instituisaun ne’ebé dinamiku ho nia profesionalismu tomak nu’udar instituisaun ne’ebé hala’o servisu bazea ba transparente, efikas no efisiensia, tempu ona atu hatur instituisaun iha paradigma foun ba konseitu fornese informasaun ba públiku.

Apartir hosi esplikasoens ne’ebé mak fo sai tiha ona, Timor Leste mós bele hanoin ona atu opta pensamentu hirak ne’e. Ho ninia konkluzaun katak tarefa hodi halo esplikasaun sobre  polítikas no  aktividades,   portavós konsideradu  nu’udar pesoál xave  ne’ebé sei transmite informasaun no fornese mós esplikasaun adekuada espesialmente ba pergunta sira ne’ebé mak iha koneksaun ba INSTITUISAUN nia lalaok, liuliu kona-ba públiku nia opiniaun ba situasaun nasionál ruma ne’ebé mak presiza INSTITUISAUN ninia prezensa hodi ko’alia ba públiku.

“Bainhira ita jere informasaun ho di’ak, públiku sei tau kunfiansa ba ita”

Hakerek nain nu’udar observadór mídia no komunikasaun.

HAKEREK NO HATÁN

Please enter your comment!
Please enter your name here