iklan

NASIONÁL, EKONOMIA, COVID-19, HEADLINE

Governu Sei Estende Tan Kontratu ho Airnorth

Governu Sei Estende Tan Kontratu ho Airnorth

Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 02 juñu 2020 (TATOLI) – Selebrasaun kontratu entre Governu Timor- Leste ho Airnorth iha loron 7 abríl, ba ligasaun aérea Darwin-Dili bá-mai atu garante konektividade iha situasaun emerjénsia nia-laran sei termina iha tempu badak, tanba ne’e haree ba situasaun atuál Governu iha ona planu atu estende kontratu.

Iha kontratu, Airnorth halo operasaun semana ida dala-tolu, ho kustu operasaun bá-mai dala ida husi Darwin-Dili hamutuk $15.000.

“Liga ho kontratu ne’ebé Governu liuhosi Ministériu Transporte no Komunikasaun (MTK) ho kompañia aviasaun australiana Airnorth estebelese, tuir kontratu ne’e sei ramata iha loron 17 juñu. Tanba ne’e atu aliña ho ita-nia estesaun ba durasaun tempu Estadu Emerjénsia datoluk, entaun presiza halo estensaun atu nune’e fó atendimentu nafatin ba koneketiivdade liuliu nesesidade emerjénsia sira durante períodu Estadu Emerjénsia”, informa Ministru Transporte no Komunikasaun, José Agostinho da Silva hafoin enkontru ho Primeiru-Ministru, Taur Matan Ruak, iha Palásiu Governu, tersa ne’e.

Notísia Relevante: Governu Asina Akordu ho Airnorth Asegura Konetividade Aéreu Iha Situasaun Emerjénsia

Governu Halo Charter ba AirNorth Voo Ba-Mai Dala-Ida ho Kustu $15.000

Maski nune’e, Ministru ne’e adianta, polítika estensaun kontratu ne’e sei deside iha konsellu Ministru iha semana ne’e.

“Kuandu kontratu ramata entaun estensaun ne’e deside iha reniaun Konsellu Ministru hodi aprovasaun liuhosi desizaun koletiva maka Ministériu Transporte no Komunikasaun bele estende kontratu ho kompañia Airnorth”, nia afirma.

Aleinde ne’e,  governante ne’e informa ba Xefe Governu kona-ba servisu MTK iha área komunikasaun, hanesan kria hotline sira no transporte, liuliu asegura konektividade durante períodu Estadu Emerjénsia hodi luta kontra COVID-19.

Konektividade ligasaun aérea ne’e hodi resposta ba restrisaun viajen ho eskala boot ne’ebé dekreta ona hodi hapara propagasaun COVID-19 no evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria no fornesimentu médiku sira ka ba transporta pasajeiru sira iha situasaun emerjénsia nian.

Aviaun ho tipu Embraer E170 husi Airnorth, halo operasaun hodi garante kontinuasaun konetividade aérea nian ho forma tula ai-moruk no ekipamentu ne’ebé nesesáriu hodi prevene no kombate COVID-19 no mós fornesimentu ba sasán esensiál sira no merkadória fundamentál sira ba vida populasaun  nian no ba empréza nasionál sira.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!