DILI, 02 juñu 2020 (TATOLI)—Governu liuhosi Ministériu Obras Públikas (MOP) no Diretór Jerál Diresaun Jerál Água no Saneamentu (DGAS), Gustavo da Cruz, ohin, tuun direta ba In-Take bee-moos iha Suku Tohumeta, Postu Administrativu Laulara, Munisípiu Aileu, hodi halo observasaun tanba iha informasaun joven no komunidade sira utiliza fatin ne’e hanesan fatin turístiku hodi hariis iha fatin refere.

Diretór Jerál Diresaun Jerál Água no Saneamentu (DGAS), Gustavo da Cruz, hateten iha informasaun katak komunidade no joven sira kontinua hariis iha fatin refere no iha pesoál balun mak halo kobransa ilegál ho presu $1.00 bainhira ba hariis iha fatin refere.

Tanba ne’e, nia dehan, DGAS halo koordenasaun ho autoridade munisípiu Aileu no Diretór Jerál Protesaun Sivíl no Seguransa (DGPSS) hodi halo intervensaun no bandu ema labele ba hariis iha fatin ne’e.

“Hosi In-Take bee iha Suku Tohumeta mak fornese bee ho volume boot mai iha Tanki Rezervatóriu Manleuana no produs sai bee-moos hodi fornese ba komunidade iha kapitál Dili. Tanba ne’e, Governu sei bandu fatin refere para ema ba vizita no hariis iha fatin refere sai fatin turístiku. Husu komprensaun ba komunidade no joven sira-nian atu evita utiliza fatin ne’e fatin turíatiku no ba haris iha fatin ne’e,” dehan Gustavo da Cruz liuhosi Servisu Água no Saneamentu (SAS) nia fanpage, tersa ne’e.

Iha observasaun ne’e, Diretór Jerál DGAS halo koordenasaun ho Autoridade munisípiu liuliu Administratór munisípiu Aileu nian no Ministériu Interiór (MI) liuhosi Diretór Jerál Protesaun Sivíl no Seguransa (DGPSS) hodi halo intervensaun no bandu komunidade no joven sira atu ba hariis iha fatin refere.

“Antes ne’e joven sira ba vizita fatin refere hanesan fatin turístiku, nune’e DGAS liuhosi Servisu Água no Saneamentu (SAS) tau ona kuadru avizu iha dalan boot, dalan entrada ba fatin refere, inklui tau iha bee-matan sira hodi nune’e komunidade no joven sira labele ba hariis iha fatin refere,” nia hateten.

Notísia Relevante: Governu Sei Monta Postu Seguransa iha Bee Mota-Ulun Tohu Meta

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here