Ministru Ensinu Superiór, Siénsia no Kultura, Longuinhos dos Santos. Imajen/TATOLI Egas Cristovao

DILI, 02 juñu 2020 (TATOLI)-Governu liuhosi Ministériu Ensinu Superiór Siénsia no Kultura (MESSK) autoriza ona pedidu husi Instituisaun Ensinu Superiór Privada no Públiku hodi re-ativa prosesu aprendijazen ba estudante universitáriu sira.

Ministru Longuinhos dos Santos, hateten prosesu aprendijazen ne’e autoriza de’it ba estudante finalista sira ne’ebé tama ona iha faze prátika laboratóriu no hakerek monografia.

Notísia Relevante :MS Sei Estuda Pedidu MEJD Kona-ba Re-Ativa Eskola Sira

Enkuantu, ba estudante sira husi semester I to’o V sei hein Ministériu Saúde atu aprova pedidu re-ativa prosesu aprendijazen ba estudante sira.

“Ohin ha’u hato’o ona ba mágnifiku Reitór UNTL nia katak ba dahuluk sira hahú fazeadamente ho estudante sira ne’ebé mak tama ona iha prátika laboratóriu no hakerek monografia,” dehan nia ba jornalista sira iha Eis Edifísiu Ministeriu Finansa,tersa (02/06).

Tuir Governante ne’e katak dekretu governu ba estadu emerjénsia ne’e konsagra ona iha artigu 19/2, funsionamentu atividade letiva ho rezime prezensiál iha eskola depende ba desizaun Ministériu da Saúde.

Entretantu, Ministériu Saúde to’o oras ne’e seidauk aprova pedidu husi Ministériu Edukasaun Juventude no Desportu no mós Ministériu Ensinu Superiór Siénsia no Kultura atu re-ativa prosesu aprendizajen hahú husi pre-eskolár to’o universidade sira.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here