OE-CUSSE, 02 juñu 2020 (TATOLI)–Prezidente Autoridade Rejiaun Administrativa Espesiál Oecusse Ambenu no Zona Ekonomia Espesiál Sosiál Merkadu Timor-Leste (RAEOA-ZEESM-TL), José Luís Guterres “Lugu”, hateten sei hakaas aan atu bele apoia Servisu Migrasaun iha tempu badak mak buka edifísiu balu atu reabilita hodi entrega ba Servisu Migrasaun.

Prezidente Autoridade hato’o asuntu ne’e, durante hala’o enkontru ho Diretór Jerál Servisu Migrasaun Timor-Leste, Superintendente Xefe, Agostinho Gomes da Silva, iha salaun Madre Domicana, Pante Macasar,  ne’ebé diskute kona-ba apoiu fasilidade hosi Autoridade RAEOA ba servisu migrasaun nian iha RAEOA, ne’ebé durante ne’e laiha edifísiu atu halo servisu.

“Autoridade RAEOA tenke kria fasilidade di’ak ba servisu migrasaun, nune’e sira mós bele kontribui ba kriasaun estabilidade sosiál. Polísia Imigrasaun sira bele servi no fasilita investór no turista sira ho di’ak iha RAEOA iha future,” dehan Lugu liuhosi komunikadu ne’ebé Ajénsia TATOLI asesu, tersa ne’e.

Prezidente Autoridade rekoñese, papél Servisu Polísia Migrasaun iha fronteira hodi kontrola movimentu lokál no estranjeiru importante tebes.

Prezidente Autoridade mós husu ba parte Servisu Migrasaun atu fó apoiu ba komunidade iha fronteira, hodi asesu ba merkadu iha fronteira.

“Ita-nia komunidade iha fronteira uza de’it border pass hodi ultrapasa fronteira. Autoridade no servisu migrasaun sei kolabora hamutuk hodi define lejislasaun ida atu bele fó kondisaun moris ba ita-nia komunidade,” autoridade ne’e subliña.

Entretantu, Diretór Jerál Servisu Migrasaun Timor-Leste, Superintendente Xefe, Agostinho Gomes da Silva hateten, problema barak mak Servisu Migrasaun enfrenta iha fronteira RAEOA. Tanba ne’e, nia husu apoiu hosi prezidente autoridade liuliu edifísiu atu halo servisu hodi atende komunidade.

“Iha Oe-Cusse, problema boot ida mak parte Servisu Polísia Migrasaun. Seidauk iha edifísiu no kazerna ida di’ak atu apoiu ba ofisiál sira, hodi bele hala’o sira-nia knaar ho di’ak no responsabilidade. Tanba ne’e, Servisu Migrasaun RAEOA presiza rai ida hodi halo konstrusaun foun,” dehan Diretór Jerál ne’e.

Aleinde ne’e, nia mós informa, Surtu Coronavirus (COVID-19) ne’ebé afeta maka’as iha nasaun viziñu Indonézia, tanba ne’e, presiza vizilánsia maka’as no koordena ho autoridade lokál sira, oinsá prevene COVID-19, tanba RAEOA poténsia boot ba risku moras ne’e.

“Situasaun ne’e, parte imigrasaun presiza tebes fasilidade sufisiente hodi kontrola movimentu ema iha fronteira,” nia dehan.

Notísia Relevante: Reprezentate Povu Atoni Hatama Petisaun Hasai Lugu hosi RAEOA

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here