Ministra Saude foun, Odete Maria Freitas Belo. Imajen/Palasiu Sinzas, Ministeriu Saude

DILI, 01 juñu 2020 (TATOLI)-Vise Ministru Saúde, Bonifácio Maucoli dos Reis, deklara sei kontinua fó apoiu ba Ministra Saúde foun, Odete Maria Freitas Belo, hodi aselera prosesu dezenvolvimentu iha área saúde durante mandatu tinan tolu 2020-2023.

Vise Ministru Saúde hato’o ninia komprimisu polítika ne’e ,durante serimonia resepsaun hodi simu Ministra foun ho tema “Ita-nia hamutuk mak saúde di’ak ba povu” iha Palasiu Sinzas Caicoli, segunda (01/06/2020).

Notísia Relevante :Ministra Saúde Foun Sei Konsidera Problema SAMES

Governante ne’e fiar katak ho Ministra foun iha kapasidade atu lidera instituisaun ne’e hodi dezenvolve di’ak liután setór saúde, tanba antes ne’e,  Ministra ne’e assume ona kargu hanesan Diretóra Ezekutiva Servisu Autónomu Medikamentu no Ekipamentu Saúde (SAMES).

“Tanba ne’e, ha’u iha espetativa katak laiha buat foun no estraordináriu ba Ministra Saúde husi funsionáriu Ministériu Saúde nian maibé ita hotu apoiu nafatin ita-nia Ministra Saúde hodi hala’o servisu foun ida ne’e,”tenik Governante ne’e, segunda ohin.

Ministériu Saúde durante tinan ida, no fulan-ualu laiha ninia superiór hafoin Prezidente Repúblika, Francisco Guterres Lú Olo, liuhosi ninia dekretu prezidensiál nú.19/2018, 22 jullu, maibé, segunda ohin, Ministru foun iha ona tanba ne’e garante sei aselera prosesu dezenvolvimentu iha setór saúde.

Iha biban hanesan , Ministra Saúde, Odete Maria Freitas Belo, dehan serimonia resepsaun ohin, konsidera importante iha ninia istória moris tanba ne’e, nia promote sei koordena servisu ho kargu xefia hotu iha instituisaun ne’e durante mandatu tinan tolu hahú 2020-2023.

“Servisu dahuluk ba oin ha’u haree uluk ekipa servisu nian no planu servisu Governu VIII ne’ebé mak trasa ona presiza saida mak ha’u haree no halo no mós ezekuzasaun no implementasaun ne’e to’o iha ne’ebé. Se implementa ona ninia rezultadu ne’e to’o iha ne’ebé no rekursu saida mak iha ona hodi hatan ba iha rezultadu sira ne’ebé mak alkansa ona,”katak Ministra Saúde, Odete.

Entretantu, partisipa iha serimonia resepsaun ba Ministra Saúde foun ne’e maka Diretór Nasionál, Diretór Munisípiu sira, parseiru internasionál sira hanesan UNDP, WHO, WFP, UNICEF, inklui profisionál saúde sira husi Ministériu Saúde.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here