Logotipu TDD. Imajen/Egas Cristóvão

DILI, 01 juñu 2020 (TATOLI) – Tribunál Distritál Dili (TDD), segunda (01/06/2020), funsiona hikas julgamentu normál ba públiku.

Notísia Relevante : Iha Ámbitu Estadu Emerjénsia, TDD Atende Kazu Urjente 15

Antes ne’e, TDD hasai ona despaxu bazeia ba sirkulár husi Tribunal Rekursu liuhusi enkontru nivel konsellu, iha loron 23 marsu 2020 hodi suspende atividade julgamentu normal, exeptu atende de’it kazu ho karakter urjénsia relasiona ho primeiru interrogatóriu, prosesu sumáriu, embargu emnorma, providénsia kautela. Nune’e atu evita ema nia direitu labale lakon durante implementasaun estadu emerjénsia.

Juiz Administradór TDD, Afonso Carmona. Imajen/Domingos Piedade

“Haree ba dekretu governu ne’ebé fó sai iha estadu emerjénsia faze datoluk ne’e autoriza fali eskola sira re-ativa ensinu aprendizajen, entaun ha’u haree tribunál mós sei funsiona hikas julgamentu normál, maibé kontinua kumpre medida prevensaun sira kona-ba coronavirus ka COVID-19 ne’ebé haktuir husi Ministériu Saúde (MS) ho Organizasaun Mundiál Saúde (OMS),”  informa Juiz Administradór Tribunál Distritál Dili, Afonso Carmona, hodi responde Ajénsia Tatoli iha nia serbisu fatin, Mandarin, Dili, segunda (01/06/20200.

Afonso Carmona hatutan, iha faze implementasaun estadu emerjénsia datoluk ne’e sei funsiona hikas ba atendimentu julgamentu normal ba públiku no TDD iha obrigasaun atu kria fasilidade bee moos ho sabaun  no garante duni distánsia fízika ho distánsia sosiál durante prosesu audiénsia julgamentu hotu iha Tribunál.

 “Ita kontinua aplika medida sira MS ho OMS nian iha Tribunál durante  estadu emerjénsia faze datoluk ne’e,” hateten Afonso Carmona.

Atende Kazu Urjente 27

Durante implementasaun estadu emerjénsia faze dahuluk no daruak hosi fulan marsu to’o maiu, tinan ne’e, TDD atende julgamentu ba kazu urjente hamutuk 27.

Afonso Carmona relata katak, husi númeru ne’e iha faze estadu emerjénsia dahuluk hamutuk kazu 15, ne’ebé kompostu husi prosesu sivíl ka embargo prosesu kautela rua (2) relasiona ho problema rai, no ba kazu krime ba prosesu sumáriu lima (5) no primeiru interrogatóriu ualu (8) kona-ba arma branka ho sira seluk-tan.

Ba faze estadu emerjénsia daruak nian, Afonso Carmona tenik, TDD atende total kazu 12, kompostu  husi primeiru interrogatóriu sia (9) relasiona kazu sira hanesan omisídiu agravadu la’en oho feen, kazu membru PNTL tiru kanek joven ida iha Maubara, kazu na’ok sasán no arma branka, ho sumáriu ida (1) kona-ba violénsia doméstika no Providénsia kautelar rua (2) relasiona ho problema rai.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here