Debate implementasaun medida ekonómika iha ámbitu prevensaun no kombate COVID-19 entre Governu no Parlamentu Nasionál (PN) iha Sala Plenáriu, segunda (01/06). Imajen Tatoli/Egas Cristovão

DILI, 01 juñu 2020 (TATOLI) – Montante saldo tezouru ne’ebé tuir lei ninia montante labele menus husi millaun $200, daudaun ne’e falta millaun $181, tanba ne’e Governu hato’o proposta ba Parlamentu Nasionál (PN) hodi halo levantamentu ba Fundu Petrolíferu hodi reforsa saldo tezouru.

“Hafoin ami aprezenta proposta atu aumenta tanba montante menus ona husi millaun $200, ne’ebé maka tuir lei saldo tezouru ne’e tenke mantein millaun $200 no labele menus husi ida ne’e, situasaun agora akontese daudaun. Diresaun Jéral Tezouru informa ona katak saldo atuál iha millaun $181, tanba ne’e presiza atu reforsa”, hateten Sara Lobo iha Sala Plenáriu, iha ámbitu debate kona-ba implementasaun medida ekonómika ho membru PN, segunda ne’e.

Notísia Relevante: KM Aprova DOT ba Fulan-Maiu ho Montante Millaun $114

Antes ne’e, iha loron 2 abríl PN aprova pedidu levantamentu Governu no iha loron 6 abríl, Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha PN, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no husi millaun $150 ne’e, aloka $500.000 ba PN atu dezenvolve polítika no programa iha ámbitu prevensaun no kombate surtu COVID-19.

Vise-Ministra esplika, bainhira Governu hakarak fixa Dotasaun Orsamentu Temporária (DOT) kada fulan, buat ne’ebé Ministériu Finansa presiza haree uluk maka montante iha saldo tezouru.

“Ida-ne’e hanesan kritériu ne’ebé mak tenke iha, kuandu saldo tezouru laiha labele lori DOT ba Konsellu Ministu hodi aprova”, nia akresenta.

Governante ne’e argumenta, saldo tinan-2019 sei iha millaun $290, ne’ebé tranzita ba inísiu fulan-janeiru 2020, iha tempu hanesan Governu mós iha reseita doméstika ne’ebé mensalmente pur média bele kobre to’o millaun $15.

“Maski iha situasaun emerjénsia maibé ita iha nafatin rekada reseita doméstika ho númeru ne’ebé ki’ik, purtantu ami halo kálkulu millaun $15 pur média”, nia salienta.

Nia subliña, durante ne’e saldo tezouru no reseita doméstika maka finansia hela DOT, enkuantu daudaun osan  millaun $116 ne’ebé Governu fixa kada-fulan ho baze ba orsamentu 2019, fahe ba doze avo ne’e fixa ona ninia montante, maibé tanba durante implementasaun Estadu Emerjénsia Governu ladún iha atividade maka gastu reál mensál pur média, hamutuk pur volta millaun $56 to’o $65.

“Tanba ne’e maka sura saldo tezouru la diminui montante ida fixa ona ba kada-fulan, maibé tenke diminui gasta ne’ebé mak atuál iha sistema. Ba osan ne’ebé gasta kada-fulan hamutuk millaun $65”, nia adianta.

Tanba ne’e bainhira millaun $181 ne’e fixa kada-fulan ho montante millaun $65, entaun bele aguenta to’o fulan-agostu 2020.

“Maibé fulan-agostu ne’e ho saldo ne’ebé menus tebes no dala ruma la konsege sustenta ona mákina Estadu. Tanba ne’e, maka proposta ami sempre hato’o antes, tanba tetu mós prosesu sira sei la’o hodi antesipa bainhira saldo ne’e iha rotura’, Sara Lobo subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here