Ministru sesante entrega servisu ba Ministru atuál iha Salaun MAP, segunda (01/06). Imajen/Mídia-MAP

DILI, 01 juñu 2020 (TATOLI) – Ministru Agrikultura Peska foun, Pedro dos Reis promete sei kontinua planu no programa ne’ebé maka Ministru sesante, Joaquim José Gusmão dos Reis Martins halo ona durante mandatu tinan-rua.

Iha loron 28 maiu, Pedro Reis ne’ebé indijitadu husi Partidu Kmanek Haburas Unidade Nasionál Timor-oan (KHUNTO) simu pose hodi okupa kargu Ministru Agrikultura Peska hodi substitui Joaquim.

“Hau hanoin kona-ba natar, toos, peska, no pekuária la’ós buat foun mai ita. Ha’u hanoin sei kontnua de’it saida maka Ministru sesante halo ona”, dehan Ministru Pedro iha seremónia entregada mandatu husi Ministru sensante ba Ministru foun ne’ebé hala’o iha Salaun Ministériu Agrikultura no Peska (MAP), Comoro, segunda ne’e.

Governante ne’e apresia esforsu Ministru sesante durante ne’e, maski ho limitasaun oin-oin maibé konsege hatudu progresu balun iha setór agrikultura no peska.

“Ha’u fó parabéns ba ha’u-nia Joaquim, maski ho dezafíu oin-oin maibé konsege implementa buat balun iha nia mandatu tinan-rua nia-laran”, nia akresenta.

Nune’e, nu’udar membru governu, nia parte husu ba diretór no kargu xefia sira atu kontinua saida maka Ministru sesante rai hela.

“Ita bele ko’alia barak no iha planu no programa barak, maibé laiha kooperasaun institusionál ne’ebé ita bo’ot sira hanesan diretór no funsionáriu sira la kolabora ho ha’u, maka susar ita atu dezenvolve instituisaun ida-ne’e. Tanba ne’e, ha’u husu atu fó susesu liután saida maka Ministru husik, ita hotu tenke kolabora malu atu fó susesu ba buat ne’ebé Ministru sesante halo ona”, tenik Ministru Pedro.

Governante foun ne’e adianta, nu’udar ema tékniku mós iha área agrikultura, nia parte promete sei tau prioridade iha planu ne’ebé maka Governu liuhosi MAP halo ona.

“Hanesan iha Konsellu Ministru foin lalais, Primeiru-Ministru orienta katak Ministériu Agrikultura no Peska tenke hasa’e produsaun. Nune’e, ha’u sei kumpre no sei esforsu, kestaun seluk maka fó nafatin prioridade ba setór agrikultura, peska, pekuária no área seluk tan”, nia realsa.

Ministru Sesante Husu Tau-Matan ba Loja Agrikultura no Sensu Agríkola

Iha fatin hanesan, Ministru sesante, Joaquim apresia funsionáriu MAP hotu tanba hatudu ona profisionalizmu hodi kolabora ho nia durante mandatu.

“Dezde ha’u mai portaun Ministeriu Agrikultura Peska, ha’u tau interese institusionál hodi fó prioridade ba vida agrikultór sira”, nia dehan.

Joaquim nota, maski iha mudansa polítika maibé funsionáriu sira hatudu nafatin profisionalizmu.

“Ita bo’ot sira nian profionál maka enkoraja ha’u durante tinan-rua ha’u halo servisu. Hau iha titipan espesiál ba Ministru foun, maka Loja Agrikultura, atu Ministru foun bele tau-matan, nune’e mós sensu agríkola rasik. Aleinde ne’e bele dezenvolve setór agrikultura, peska no peskuária”, nia subliña.

Ministru sesante ne’e mós la haluha apresia parseiru dezenvolvimentu sira , ne’ebé durante ne’e fó apoia iha nia mandatu nia-laran hanesan JICA, WFP no seluk tan hodi haree ba área agrikultora, peska no peskuária nian.

Seremónia ne’e hetan partisipasaun másimu husi funsionáriu, diretór no kargu xefia sira iha MAP.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here