COVID-19

DILI, 01 juñu 2020 (TATOLI)-Institutu Nasionál Formasaun Dosente no Profisionál (INFORDEPE) iha ona planu sei fó formasaun kona-ba prevensaun COVID-19 ba profesór sira hamutuk 15.000 iha territóriu Timor-Leste.

Prezidente INFORDEPE Interinu, Arlindo Pinto, hateten servisu tékniku prepara ona matéria hodi fó formasaun ho tipu online no prenzensiál ba profesór sira iha tempu badak.

Objetivu husi formasaun ne’e maka oinsá hasa’e koiñesementu profesór sira-nian kona-ba meiu prevensaun COVID-19 ho ninia trasmisaun sira atu nune’e bele introdúz filafali ba estudante sira bainhira prosesu aprendijazen re-ativa ona.

“Matéria ne’ebé mak ita sei fó ba profesór sira ne’e sei konsentra ba COVID-19 nian ho intensaun mak atu fasilita sira oinsá bele hatene koidadu ijiéne hanesan fase liman ho sabaun no mós tenki hatene halo des-infetan tuir matadalan ne’ebé mak ita-nia Ministeriu Saúde fó sai ona,” dehan, Nia ba Jornalista Sira iha ninia servisu fatin Mataduro, (01/06/2020).

Formasaun ne’ebé maka INFORDEPE dezeña iha tipu rua mak formasaun liuhosi meiu online no prenzensiál diretamente ho profesór sira ne’ebé maka sei realiza iha Postu Administrativu idaidak.

Formadór husi INFORDEPE sei hahú lansa formasaun via online ne’e iha loron 03 fulan-juñu tanba preprasaun matéria atinje ona pursentu 85.

Enkuantu, formasaun prezensiál sei hahú iha loron 05 fulan ne’e no sei ramata iha loron 15 fulan-juñu 2020 iha Postu Administrativu idak-idak.

“Formasaun ne’e sei hetan akompañamentu husi formadór, mentór nasionál,  lokál  hamutuk ema na’in 80 inklui formadór internasionál husi Portugal na’in 10 kona-ba língua Portugués,” tenik tan.

Nia haktuir tan katak ho formasaun ne’e sei tulun profesór sira atu hanorin estudante sira oinsá halo prevensaun ba transmisaun surtu coronavirus.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here