Vice Xefe Bankada FRETIlIN, Francisco Miranda Branco. Imajen/Egas Cristovão

DILI, 01 juñu 2020 (TATOLI)—Bankada Frente Revolusionária Timor-Leste Independente (FRETILIN) husu Komisaun A (Justisa no Konstitusionál) atu aselera kontinuasaun diskusaun Lei Antí Korrupsaun (LAK).

Xefe Bankada FRETILIN, Deputadu Francisco Miranda Branco, husu tau atensaun ba komisaun espesializada sira nune’e komisaun espesializada sira parlamentu nian bele funsiona ho di’ak.

“Proposta no projetu lei lubuk ida mak parlamentu ida-ne’e tenke tau matan no finaliza. Proposta lei importante ida-ne’ebé FRETILIN hanoin Parlamentu Nasional tenke prioritiza no finaliza lalais iha tempu badak ne’e nia laran mak Lei Anti Korupsaun,” dehan Deputadu Francisco Miranda Branco liuhosi plenária, Parlamentu Nasionál, segunda ne’e.

Xefe Bankada FRETILIN ne’e subliña, atu konsege hala’o serbisu importante sira ne’e tenke blokeia sira hotu ne’ebé daudaun ne’e komisaun espesializada sira hasoru hela tenke loke atu garante komisaun sira fila-fali ba funsionamentu normal.

“Basá, funsionamentu normál iha komisaun espesializada sira sei garante funsionamentu normál parlamentu tomak nian no nune’e loke dalan ba Parlamentu Nasional hala’o duni serbisu ne’ebé ba ita-nia povu no ita-nia rain,” nia dehan.

Bankada FRETILIN hanoin katak deputadu sira-ne’ebé mak oras ne’e daudaun hola funsaun lideransa meza komisaun espesializada sira-nian tenke imediatamente hapara ona sira-nia hahalok boikota iha komisaun hirak ne’ebé sira lidera hela.

Maibé, tuir nia, se sira lakohi hapara sira-nia áktu boikote sira ne’e, deputadu membru hosi komisaun hirak ne’e tenke destitui duni sira no eleje meza komisaun foun atu lori komisaun sira fila-fali ba funsionamentu normál.

“Timor-Leste labele hein tan. Ita-nia povu no ita-nia Nasaun labele haree beibeik mak ita-nia áktu arrogánsia no drama polítika folin laek sira-ne’e. Ita-nia povu no ita-nia Nasaun hakarak no eziji ita atu halo serbisu ne’ebé povu fó fiar ba ita mai tuur iha ne’e atu hala’o. Oras to’o ona! Timor-Leste labele hein tan. Hamutuk ita garante Timor-Leste tenki la’o ba oin,” Xefe Bankada FRETILIN, Francisco Miranda Branco, hateten.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here