Xefe Suku Vila-Maumeta, Filipe Ximenes. Imajen Tatoli/Cipriano Colo.

DILI, 30 maiu 2020 (TATOLI)–Xefe Suku Vila-Maumeta, Filipe Ximenes, rekoñese durante tinan rua hahú hosi tinan 2019 to’o 2020, povu Suku Villa-Maumeta, Postu Administrativu Ataúro, Munisípiu Dili, falta ai-han kauza hosi mudansa klimátika.

“Mudansa klimátika fó impaktu makaas ba ha’u-nia komunidade tanba maioria komunidade iha ha’u-nia suku moris hanesan toos-na’in no peska. Tinan rua ona udan la mai. Udan been laiha. Entaun, komunidade labele kuda buat ruma no labele hetan ai-han. Atu rai ba fini de’it mós laiha,” dehan Xefe Suku, Filipe Ximenes, ba Ajénsia TATOLI iha Villa Maumeta, sábadu ne’e.

Filipe hatutan, komunidade batar laiha, tunis, fore, hanesan tinan sira ne’ebé liu ona tanba bai-bain povu sempre sustenta aan ho buat sira-ne’e. Maibé, nia dehan, tinan ida-ne’e povu ne’e dalaruma la han ne’e la han tebes duni.

“Ami-nia kultura ka karáter ema Ataúro nian, maski hamlaha hela maibé nonook de’it,” autoridade lokál ne’e haktuir.

Situasaun ne’e, tuir nia, sai preokupasaun ba  autoridade lokál hodi buka inisiativa hodi hatama proposta ba Ministéiru Solidaridade Sosiál no Inkluzaun no konsege fó apoiu fós saka 500 ba komunidade sira.

Aleinde hetan apoiu hosi Governu, nia informa, grupu partidu politiku balun no entidade privadu sira inklui Espoza Prezidente Repúblika ne’ebé apoiu tan fós saka 500.

“Ho ida-ne’e fiar katak, bele hakmaan netik povu nia terus liuliu bele sustenta aan durante Estadu Emerjénsia datoluk ne’e,” nia hateten.

Hanesan autoridade lokál, Filipe  agradese ba ema sira ne’ebé mai fó apoiu ba komunidade ne’ebé falta duni aihan iha Ataúro enjerál, liuliu komunidade sira iha Suku Vila-Maumeta.

Entretantu, Suku Vila-Maumeta iha Aldeia tolu mak hanesan Aldeia Eklae, Ilimanu no Aldeia Ileticaraquia ne’ebé kompostu hosi uma-kain 442 ho totál populasaun hamutuk 1.893.

Notísia Relevante: Administradór Ataúro Agradese ba Estadu Aplika Liberdade Movimentasaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here