Sarani sira tuir misa dahuluk iha Igreja Motaél hafoin suspende fulan-rua resin, domingu (31/05). Imajen Tatoli/Antónia Gusmão

DILI, 31 maiu 2020 (TATOLI) – Domingu ne’e nu’udar domingu ikus Páskoa ninian, ne’ebé Konferénsia Episkopál Timor-oan deside re-ativa misa hafoin suspende durante fulan-rua nia-laran tanba atu kumpre regra iha implementasaun Estadu Emerjénsia ligadu surtu COVID-19.

Antes hahú selebrasaun eukaristia, realiza uluk reza ba Santo António ne’ebé hanesan mahein ba Igreja Motaél.

Padre Pároku Motaél, Guilhermino da Silva, hateten iha domingu ne’e Kreda Katólika selebra Domingu Pentecostes nu’udar rohan hosi festa Páskoa ninian.

“Ohin loron dahuluk ita halibur malu filafali hafoin fulan-rua resin Coronavírus ninia prezensa iha mundu, izola ita hotu iha ita idaidak ninia uma. Páskoa tinan ida-ne’e hakmatek tebes no halo ita hatene hadomi Nai Maromak liuhosi hadomi ita-nia maluk sira konkretamente ho espíritu Páskoa nian, ne’ebé ema barak konsege sai husi nia-uma no sira-nia an hodi hatudu solidariedade ba malu ne’ebé susar, mukit no kiak”, dehan Padre Guilhermino da Silva iha ninia ómilia iha ámbitu misa iha Igreja Motaél, domingu ne’e.

Tuir Amu Pároku ne’e, selebrasaun ne’e hakarak hatudu ba sarani sira kona-ba Maromak nia kbi’it, hafoin Jesus Kristu sa’e ba lalehan no Maromak hakra’ik Nia kbi’it ba sarani sira atubele moris hanesan kreda iha momentu ida ne’e.

Iha omília Amu haklaken, Pentecostes bele halo ema barak rona ema nia lian, nu’udar sira nia lian rasik no sira mós bele haree buat ne’ebé halo liuhosi apóstolu sira.

“Aktu sira ne’e merese duni ita hotu agradese ba Maromak Santísima Trindade, ne’ebé akompaña ona ita iha ita-nia moris iha rai ne’e no Pentecoste transforma duni ema nia fuan husi sira ne’ebé lahatene hadomi halo sira hatene hadomi, hosi sira ne’ebé la hakmatek iha uma hatene hakmatek iha uma hodi hanoin Nai Maromak nia domin iha sira-nia vida”, nia akresenta.

Maski nune’e, nia fó hanoin ba sarani sira labele haluha katak iha traballu seluk atu halo, ne’ebé Nai Maromak sakrifika sarani sira ba nasaun nia vida.

“Ho Pentecostes ida-ne’e, ita tenke hafoun ita-nia an, hafoun ita-nia nasaun tuir justisa sosiál no regra jerál ne’ebé vigora ona, tanba ida-ne’e mak ita-nia traballu no obrigasaun atu halo hodi husu Espíritu Santu nia tulun ba ita idaidak nia-an atu ita kontribui moris ida ne’ebé pozitivu ba ita-nia komunidade no ba ita-nia nasaun”, nia subliña.

Amu Pároku Motaél Husu Sarani Labele Hasai Liafuan Kro’at iha Mídia Sosiál

Padre Guilhermino mós husu ba sarani sira atu labele hasai liafuan kro’at iha mídia Sosiál relasiona ho situasaun polítika iha rai-laran.

“Ita hotu hatene ho situasaun politíka rai-laran hanesan oras ne’e daudaun, ema barak dezesperadu, nune’e hatudu sira-nia hanoin ho liafuan ne’ebé kro’at no ladún di’ak liuhosi mídia sosiál sira. Hanesan ema sarani ita tenke mantein ita-nia fiar katak buat hotu ne’ebé di’ak maihusi ita nia-an ne’e hanesan Nai Maromak nian. Nai Maromak nia oan nunka hasai buat ne’ebé negativu iha sira-nia vida ba ema seluk”, apelu Amu Pároku ne’e.

Amu Guilhermino adianta, ho Espíritu Santu nia prezensa, nu’udar ema sarani iha obrigasaun atu transforma situasaun negativu ne’ebé iha ba situasaun ida ne’ebé hamosu bein komún ba ema hotu.

Tuir observasaun Agênsia Tatoli, iha selebrasaun misa iha Igreja Motaél partisipa másimu husi sarani ne’ebé maizumenus porsentu 60 maka uza máskara.

Aleinde ne’e, Padre Pároku Guilhermino da Silva fó sai avizu katak sekretariadu hahú atende ona sarani ne’ebé hakarak trata dokumentu normál no tuir autorizasaun husi Kreda Timór katak bele realiza de’it selebrasaun aukarístika.

“Signifika misa de’it no ba selebrasaun seluk hanesan krisma, batismu, no kazamentu seidauk bele tanba sei iha períodu Estadu Emerjénsia nia-laran, maibé bainhira sarani ruma hakarak konfesa bele hakat mai igreja”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here