Komandante Ein-Xefe FALINTIL, Xanana Gusmão, koordena ho Komandante PNTL Munisípiu Manatuto, Superintendente Júlia da Gama, hodi fó apoiu ai-han ba ema ho sufisiénsia sira iha Manatuto, sábadu (30/05/2020). Imajen/Eugénio Pereira

MANATUTO, 30 maiu 2020 (TATOLI) – Eis Komandante Ein-Xefe FALINTIL, Kay Rala Xanana, dezafia membru Polísia Nasionál Timor-Leste (PNTL) atu hala’o serbisu labele haree de’it ba implementasaun lei no orden, maibé mós presiza asegura no tau matan ba sidadaun sira ne’ebé moris iha situasaun krusiál liu-liu ema ho defisiénsia ligadu situasaun estadu emerjénsia no surtu Coronavirus ka COVID-19.

Notísia Relevante : Xanana Alerta ba Foin-Sa’e Atu Pratika Arte Marsiál Tuir Dalan

Komandante Ein-Xefe FALINTIL, Xanana Gusmão, halo kontinénsia bainhira vizita ba Kazerna PNTL Munisípiu Manatuto, sábadu (30/05/2020). Imajen/Eugénio Pereira

“Imi Polísia hala’o serbisu bazeia ba lei no orden, maibé mós tenke asegura sidadaun sira nia moris liuhusi ajuda sira ne’ebé presiza iha situasaun difisil hanesan ita nia inan, alin no oan sira ne’ebé defisiente no presiza ita lolo-liman hodi tulun sira,” hateten  Xanana Gusmão, bainhira fó apoiu ai-han família defisiénsia sira iha Kazerna Komandu PNTL Munisípiu Manatuto, sábadu (30/05/2020).

Xanana mós husu ba PNTL atu kontinua tau matan  ba movimentu sidadaun sira hodi sosializa informasaun kona-ba prevensaun COVID-19 tuir regra ka orientasaun Organizasaun Saúde Mundiál ho Ministériu Saúde nian.

Iha fatin hanesan, Komandante PNTL Munisípiu Manatuto, Superintendente Júlia da Gama, hato’o agradese ho vizita espesiál Komandante Ein-Xefe FALINTIL nian ne’e hodi fó apoiu direita ba defisiente sira ne’ebé Ofisiál Polísia Suku (OPS) halibur hamutuk husi suku-haat (4)   hanesan, Ma-abat, Suku Sua Suku Ailili  ho Suku Aiteas.

“Ita nia maluk defisiénsia ne’e ami nia Ofisiál Polísia Suku (OPS) koopera ho xefe suku sira maka identifika sira moris duni iha situasaun difisil tebes,” Superintendente Júlia Gama hateten.

Responde ba sujestaun Xanana nian hodi husu PNTL  atu tau matan ba ema kbiit-laek sira, Superintendente Júlia Gama, hateten, durante lidera komandu PNTL Manatuto besik fulan-neen, nia parte orienta membru OPS sira kontinua implementa lei orden no tau matan mós ba ema vulneravel sira.

“Alende implementa lei no próteze sidadaun sira husi ameasa, ami mós tau matan ba ema ho defisiénsia no kbiit laek sira ne’ebé ami identifika sira moris susar tebe no presiza duni apoiu,” Júlia Gama hateten.

Parte seluk, Xanana dehan apoiu ne’e nu’udar asaun umanu fahe liu ba sira ne’ebé moris iha susar nia laran.

“Ami mai ho sasán uitoan, tanba iha fatin barak mós ami apoiu barak seidauk simu mai hanesan ajuda malu fahe uitoan-uitoan hodi ita lolo liman ba malu,” Xanana hateten.

Biban ne’e, Xefe Suku Sau, Barba Gama hato’o agradese ba Xanana ho nia ekipa ne’ebé iha vontade boot solidariedade hodi tulun populasaun kbiit-laek no maluk defisiénsia sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here