Embaxadór Timor Leste ba kambodia Hermenegildo Kupa Lopes hasoru malu ho Primeiru Ministru Kambodia. Samdech Hun Sen.Imajen/Facebook

DILI, 30 maiu 2020 (TATOLI)-Embaixadór Timor-Leste ba Kambódia, Hermenegildo Lopez ‘Kupa’ hateten, rezultadu enkontru ho Primeiru-Minsitru nasaun ne’ebá, F Samdech Hun Sen, oinlalais hakarak Timor-Leste adere ona ba organizasaun AZEAN (The Association of Southeast Asian Nations).

“Ha’u hasoru malu ho Primeiru-Ministru Kambódia nian ami ko’alia asuntu lubuk ida, liliu Primeiru-Ministru ne’e hakarak no apoiu ita tenki tama lalais sai membru AZEAN sira-nia parte apoiu tebes tanba ita-nia proposta hatama ba AZEAN ne’e tinan 9-resin ona,”dehan Kupa ba Agência TATOLI, via mídia sosiál, whatsapp, sábadu ohin.

Xefe Governu husi nasaun ne’e husu ba Estadu Timor-Leste, atu kontinua pasensia no esforsu nafatin hodi atinje objetivu nasaun nian maka adere ba AZEAN.

Iha parte seluk, Primeiru-Ministru Kambódia Samdech Hun Sen, afirma sira-nia nasaun mós iha protidaun atu kontinua oferese bolsa estudu ba Timoroan iha futuru.

“Iha tinan kotuk sira fó ona bolsa estudu ba Timoroan na’in 10 ne’ebé agora eskola hela iha Universidade kambódia, liliu iha área agrikultura nian. Kambódia mós hakarak ita halo kooperasaun téknika iha área agrikultura tanba sira nasaun ida ne’ebé susesu iha produsaun hare,” tenik Kupa.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here