Membru Governu VIII Kontituisionál hala’o le termu pose perante Prezidente Repúblika. Imajen Tatoli/António Gonçalves

DILI, 29 maiu 2020 (TATOLI) – Hafoin Membru Governu foun simu pose hosi Prezidente Repúblika (PR), Francisco Guterres, Primeiru Ministru (PM), Taur Matan Ruak konvoka reuniaun ho Membru Governu emposadu sira iha Palásiu Governu, sexta ne’e.

Durante reuniaun, Xefe Governu hato’o vizaun globál VIII Governu Konstitusionál nian ba dezenvolvimentu Timor-Leste durante mandatu, inklui ligasaun mós ho kada Ministériu nia servisu.

Pontu importante iha reuniaun dahuluk ne’e, PM apela ba governante sira katak hakarak espíritu ekipa ba Membru Governu sira hotu no hakarak atu iha autonomia ne’ebé forte no espíritu ekipa, inklui iha kapasidade forte atu rezolve problema no dezafíu.

“Membru Governu foun realiza enkontru ho Primeiru-Ministru ho objetivu ida katak Primeiru-Ministru fó bem vindu ba Membru Governu foun no iha enkontru dahuluk ne’e Primeiru-Ministru fahe vizaun ba dezenvolvimentu iha Timor-Leste nune’e, bele hakat ba oin liuliu tinan hirak ne’ebé mak sei iha durante mandatu VIII Governu”, relata Ministru Prezidénsia Konsellu Ministru, Fidelis Manuel Leite Magalhães.

Enkontru ne’e realiza hafoin reuniaun Konsellu Ministru.

Aleinde ne’e, Xefe Governu koalia kona-ba asuntu setor ne’ebé sai prioridade atubele tau atensaun maka’as, nune’e bele lori dezenvolvimentu ba Timor-Leste.

Entretantu tempu badak Governu sei realiza retiru ida ba Membru Governu hotu hodi haree didi’ak kona-ba grande vizaun nasaun no Estadu nian, inklui haree mós prioridade hirak iha kada setór nian no halo ligasaun entre preokupasaun setorál, individuál ho preokupasaun globál transversál Estadu nian tomak.

Membru Governu ne’ebé hetan pose ba faze dahuluk ne’e maka hanesan Vise-Primeira-Ministra Armanda Berta dos Santos, Ministru Prezidénsia Konsellu Ministru Fidelis Manuel Leite Magalhães, Ministru ba Asuntu Parlamentár no Komunikasaun Sosiál Francisco Martins da Costa Perreira Jerónimo, Ministru Finansa Fernando Hanjam, Ministru Administrasaun Estatál Miguel Pereira de Carvalho, Ministra Saúde Odete Maria Freitas Belo, Ministru ba Asuntu Kombatente Libertasaun Nasionál Júlio Sarmento da Costa ‘Meta Malik’, no Ministru Agrikultura no Peskas Pedro dos Reis.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here