Enkontru entre Autoridade RAEOA no entidade sira hotu iha Otél Otél Fitun Lima, Oé-Pupu, Oé-Cusse, sesta (29/05). Imajen/ RAEOA-ZEESM,TL

DILI, 29 maiu 2020 (TATOLI) – Prezidente Autoridade Rejiaun Administrativa Oé-cusse Ambeno (RAEOA), José Luis Guterres ‘Lugu’, hateten Autoridade RAEOA sei aselera hodi kompleta fasilidade hirak ne’ebé povu presiza tebes liuhosi fundu luta kontra COVID-19 RAEOA ne’ebé mak prepara rasik husi ekipa Brigada Soque.

“Iha tempu badak, ita sei uza orsamentu COVID-19 no emerjénsia hodi responde disponível bee moos ba postu saúde, merkadu no edifísiu públiku hodi komunidade sira bele fase-liman”, dehan Lugu hanesan haktuir husi nota impresa ne’ebé Agência TATOLI asesu, sábadu ne’e.

Lia hirak ne’e hato’o iha enkontru aberta ho kamada sosiedade hotu iha loron 29 maiu, iha Otél Fitun Lima, Oé-Pupu, Oé-Cusse.

Iha biban ne’e, Prezidente Autoridade mós rekoñese katak RAEOA agora daudaun sei utiliza Dotasaun Orsamentu Temporáriu (DOT) tanba ne’e autoridade seidauk bele realiza programa ne’ebé sei fó benefísiu direita ba komunidade.

“Komunidade-nia problema báziku mak ne’e, bee no saneamentu, edifísiu eskola ne’ebé la favorável ba estudante atu estuda, falta postu saúde, liuliu estrada atu komunidade bele fa’an sira-nia produtu lokál hodi hadi’ak sira-nia rendimentu família”, dehan Lugu.

Iha sorumutu ne’e Servisu Saúde RAEOA relata mos totál sidadaun hirak ne’ebe hetan ona tratamentu liuhosi fatin akollimentu durante fulan-marsu to’o maiu 2020 iha Sentru Akollimentu tolu, hanesan Otél Lifau, Otel Cinco Estrela, no Rezidénsia Fulolo.

Diretór Saúde RAEOA interinu, Luís Neno, informa entre ema na’in-201, iha suspeitu ema na’in-29 no bainhira foti sira-nia amostra hodi teste iha laboratóriu nasionál, hatudu rezultadu negativu hotu no to’o ohin loron hela de’it na’in-10 mak nafatin hela iha sentru akollimentu hodi kompleta loron 14.

Bazeia ba orientasaun husi Ministériu Saúde, Dirijente Serbisu Saúde RAEOA foti ona amostra porsentu 1 husi totál populasaun RAEOA hamutuk 73.716 habitante hodi halo teste, enkuantu rezultadu teste ba amostra husi ema 71 hafoin halo teste iha laboratóriu nasionál hatudu rezultadu negativu horu.

“Ho nune’e, temporariamente RAOEA sei livre husi COVID-19. Ami iha planu atu hala’o teste públiku ba ita-nia populasaun sira iha postu saúde, klínika no sentru saúde sira. Bainhira hetan ema ruma iha sintoma ba COVID-19, ita sei lori sira ba Sentru Akollimentu no Sentru Izolamentu iha Klínika Kurasaun”, Luis Neno salienta.

Iha parte seluk, apoiu umanitária ba Povu Atoni, Autoridade RAEOA liuhosi autorizasaun Prezidente RAEOA orienta ona ekipa Apoiu Umanitária COVID-19 RAEOA hodi bele fó asisténsia umanitária ba povu kbiit laek sira durante aplikasaun Estadu Emerjénsia.

“Benefisiáriu hamutuk 1.161 mak hetan ona apoiu umanitária ba nesesidade bázika iha suku 18 no aldeia 63 durante implementasaun Estadu Emerjénsia iha RAEOA”, katak Koordenadór Servisu Apoiu Umanitária COVID-19 RAEOA, Agostino Caet.

Apoiu Umanitária hirak ne’e distribui ona ba orfanatu, estudante no komunidade kbiit laek sira tantu iha Dili no Oé-cusse ne’ebé hetan mós tulun husi Sentru Lojístika Nasionál (CLN, sigla portugés) foos saku 1.000 ho ninia kompozisaun saku 250 ba Oé-cusse oan sira ne’ebé hela iha Dili no saku 750 ba RAEOA.

Reprezentante líder komunitáriu, Xefe Suku Naemeco, Marcos orgullu ba medida resposta ne’ebé rápida husi Autoridade RAEOA hodi atua ho rápidu asisténsia umanitária ba komunidade sira iha sira-nia suku no aldeia ida-idak.

“Durante surtu COVID-19 no Estadu Emerjénsia, ami-nia komunidade kbiit laek sira hetan apoiu umanitária husi ekipa apoiu umanitária husi Komisaun COVID-19. Ha’u agradese ba apoiu umanitária ne’e”, deklara Xefe Suku Naemeco.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here