Vise Prezidente Parlamentu Nasionál, Maria Angelina Sarmento. Imajen/Egas Cristóvão

DILI, 29 maiu 2020 (TATOLI)—Vise-Prezidente Parlamentu Nasionál, Deputada Maria Angelina Sarmento Lopes hateten, ohin, Parlamentu Nasionál simu ona proposta alterasaun artigu balu hosi Fundu COVID-19 tanba durante ne’e “kesi-metin” Governu atu implementa ámbitu situasaun Estadu Emerjénsia hodi hasoru propagasaun COVID-19.

“Ohin, Parlamentu Nasionál simu ona pedidu (proposta) alterasaun ba lei artigu balun hosi Fundu COVID-19 tanba iha ezekusaun Governu haree katak iha difikuldade atu ezekuta osan ne’e ho prosesu ida-ne’ebé la’o lalais. Artigu ida-ne’e mak kesi-metin Governu atu laiha fleksibilidade ezekuta osan ida-ne’e,” Deputada Maria Angelina Sarmento Lopes informa ba jornalista sira hafoin prezide reuniaun líder bankada aprova ajenda plenária nian ba loron 01–02 juñu 2020 iha Parlamentu Nasionál, sesta ne’e.

Parlamentu Nasionál (PN) aprova pedidu levantamentu estraordinária hosi fundu petrolíferu millaun $250. Hosi millaun $250  ne’e millaun $100 reforsa kaixa tezouru hodi finansia orsamentu duodésimu no millaun $150 prevee ba fundu COVID-19.

Nia hatutan, Governu nia proposta husu alterasaun ba artigu 5 hosi lei númeru 2/2020, 6 abríl ne’ebé Fundu COVID-19 jestór mak Ministériu Finansa, Ministériu Saúde no Ministériu Negósiu Estranjeiru no Kooperasaun (MNEK).

Nia esplika, lei númeru 2/2020, artigu 5 (Fundu COVID-19) alínea 4 hateten konsellu jesaun fundu komposta hosi membru Governu ne’ebé responsável iha área finansa mak hanesan Ministra Finansa, Ministra Saúde no Ministériu Negósiu Estranjeiru no Kooperasaun.

Lei númeru 2/2020, 6 abríl kona-ba autorizasaun ba realizasaun tranferénsia estraordinária hosi fundu petrolíferu. Hosi lei ne’e artigu 5 (Fundu COVID-19) alínea 3 hateten entidade responsável liuhosi operasaun no administrasaun hodi fundu mak Konsellu Jestaun, sein prejuízu kompeténsia hosi membru Governu ne’ebé responsável hosi área finansa, iha lejizlasaun finansa públika nia okos no membru Governu ne’ebé responsável hosi área saúde iha lejizlasaun saúde nia okos.

Tuir nia, alínea 4 hosi artigu ne’e hateten konsellu jestaun fundu komposta hosi membru Governu ne’ebé responsável mak área finansa, saúde no área negósiu estranjeiru.

Alínea 2 hateten,  fundu ne’e ninia objetivu hodi finansia despeza relasaun ho prevensaun no kombate surtu COVID-19 mak hanesan;

  1. Akizisaun medikamentu, materiál no ekipamentu médiku hala’o hodi halo prevensaun no kombate vírus SARS-Cov-2 (COVID-19), inklui kontratasaun servisu transporte aéru, bainhira nesesáriu.
  2. Instalasaun no manutensaun destinada ba realizasaun kuarentena no izolamentu.
  3. Formasaun no realizasaun hosi profisionál ne’ebé envolve iha ámbitu prevensaun no kombate hasoru surtu COVID-19.
  4. Akiziasaun no fornesimentu ba bens esensiál sira.
  5. Protesaun sosiál ba vítima hosi SARS-Covid-2 (COVID-19).
  6. Despeza seluk ne’ebé la prevé iha alínea anteriór.

“Ami seidauk haree konteúdu hosi pedidu alterasaun ne’e maibé tuir ha’u-nia entendimentu  atu altera de’it ba ministériu ne’ebé mak atu ezekuta fundu COVID-19 ne’e la’ós altera husu tán pedidu adisionál,” nia hateten.

Tuir planu, nia informa, iha segunda semana oin, Prezidente Parlamentu Nasionál Aniceto Longuinhos Guterres Lopez sei baixa ba Komisaun C (Finansa Públika) nune’e Komisaun C bele halo audiénsia ho instituisaun relevante.

“Se la nesesáriu atu halo audiénsia, ne’e depende ba desizaun Komisaun C nian no Komisaun sei elabora relatóriu no pareser hodi halo aprezentasaun ba plenária,” nia esplika.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here