Ministra Saude foun, Odete Maria Freitas Belo. Imajen/Palasiu Sinzas, Ministeriu Saude

DILI, 29 maiu 2020 (TATOLI)-Ministra Saúde foun, Odete Maria Freitas Belo, informa sei halo uluk koordenasaun servisu ho Vise Ministru Estratéjiku Dezenvolvimentu Saúde, Bonifácio Maucoli dos Reis, ho kargu Xefia seluk tan hodi implementa polítika no programa Ministériu nian ba tinan 2020.

Tuir ninia observasaun katak durante ne’e Ministériu Saúde enfrenta problema orsamentu atu uza hodi implementa programa sira ne’ebé maka trasa ona iha tinan ne’e, tanba mákina estadu funsiona de’it ho orsamentu duodesimu.

Notísia Relevante :Xefe Estadu Husu Membru Governu Foun Komprende Kbiit Laek Sira-Nia Hakarak

Odete dehan asuntu COVID-19 sei sai mós prioridade Governu nian durante tinan 2020.

Hanoin sesta lokraik (29/05/2020) iha enkontru Konsellu Ministru entaun sei ko’alia barak saida mak sei halo no aselera iha fulan-lima ka fulan-tolu iha tinan 2020 nian depois mak haree fali iha tinan 2021 nian saida mak atu halo,” katak Ministra Saúde ba Jornalista sira hafoin halo vizita dahuluk ba Servisu Autónomu Medikamentu no Ekipamentu Saúde (SAMES).

Governante ne’ebé nomea husi Partidu FRETILIN ne’e sei hahú halo ninia servisu iha segunda (01/06/2020).

“Ohin ha’u mai kumprimenta SAMES bainhira ha’u sai Ministra saúde tanba antes ne’e ha’u hala’o kna’ar nu’udar Diretóra Ezekutivu SAMES nian,” katak Nia.

Iha fatin hanesan Diretór Servisu Autónomu Medikamentu no Ekipamentu Saúde (SAMES), Santana Martins, sente orgullu ho prezensa Ministra Saúde foun nian hafoin simu pose husi Prezidente Repúblika, Francisco Guterres Lú Olo, iha Palasiu Prezidensiál Bairo-Pité Dili, ohin.

“Ami-nia apresia no orgullu ba konsiderasaun hosi Primeiru-Ministru ne’ebé mak ho profisaun no Prezidente Repúblika nian ne’ebé hili funsionáriu SAMES nian sai Ministra Saúde,”nia akresenta.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here