Primeiru Ministru Taur Matan Ruak,Imajen Tatoli/António Gonçalves

DILI, 28 maiu 2020 (TATOLI) – Iha seremónia tomada pose Prezidente no Komisária na’in-rua Komisaun Funsaun Públika (KFP), Primeiru-Ministru (PM), Taur Matan Ruak, rekoñese funsionamentu administrasaun públika ida di’ak presiza fatór barak, liuliu rekursu umanu, tanba iha istória fatór ne’ebé lori Timór sai nasaun maka rekursu umanu.

“Ita-nia Estadu, bainhira administrasaun públika atu funsiona ho di’ak presiza fatór barak, ida mak ita-nia rekursu umanu tanba iha istória Timór, fatór ne’ebé lori ita manan iha dezafíu hotu mak ita-nia ema. Tanba ita nasaun ida ki’ik no povu ida ki’ak, ne’ebé sikat iha nasaun boot sira nia klaran, laiha meiuno rekursu maibé lori ema, vontade, pasiénsia no determinasaun ita manan dezafíuhotu hodi afirma ita-nia an hanesan nasaun no povu. Orgullozu loos, kultura ida-ne’e mak ita lori nafatin, ema mak bele muda sasán la’ós sasan mak bele muda ema”, hateten PM Taur iha Palásiu Governu, kinta ne’e.

Eis Prezidente Repúblika ne’e afima, papél funsionamentu públiku importante tebes, tanba ne’e reforma sira ne’ebé Governu halo iha tempu oinmai no balun halo daudaun, konsentra iha objetivu importante rua hanesan hakbesik Estadu ba povu no hakbiit an atu presta servisu di’ak ba sidadaun sira.

“Ita mai asume funsaun sira temporáriamente, ita troka malu, ida tama ida sai, maibé hotu-hotu kumpre tranzisaun tranzitoriamente no fó kontribuisaun ba dezenvolvimentu nasaun. Ohin ita sente saida mak ita halo, maibé loron ruma ita iha fali li’ur mós ita hateke fali mai saida mak ita halo liu tiha ona no saida mak ita eziji ba sira seluk atubele halo tán”, subliña Xefe Governu.

Nia rekoñese katak funsionalizmu públiku daudaun iha difikuldade barak tebes hahú husi infraestrutura, ekipamentu no promosaun sira.

“Ha’u espera iha tempu badak ita serbisu hamutuk di’ak liután hodi hetan planu ida sistemátiku no sustentável hodi ajuda ita neneik, inklui hadi’a di’ak liután ita-nia funsionalizmu públiku”, nia akresenta.

KFP harii iha tinan-2009 no estabelese atu reforsa kapasidade Administrasaun Públika nian no garante katak setór públiku bazeia ba méritu no tuir modelu profisionál ne’ebé a’as atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.

Komisaun ne’e mós jere Sistema Informasaun no Jestaun Pesoál nian (PMIS), iha baze-dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.

Daudaun ne’e totál númeru funsionáriu públiku sira nian maka besik 32.000.

Dezde tempu VI Governu Konstitusionál, hahú hapara rekrutamentu funsionáriu permanente sira nian no hahú ona haree filafali kuadru jurídiku, tama mós Lei Funsaun Públika no Estatutu Funsaun Públika nian, hamutuk ho KFP no dirijente sira área rekursu umanu sira-nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here