Prezidente Repúblika, Francisco Guterres Lú Olo. Imajen Tatoli/António Goncalves

DILI, 28 maiu 2020 (TATOLI)–Xefe Estadu Francisco Guterres “Lú Olo” iha esperansa katak governu konklui ona dadus vulnerável sira iha territóriu tomak atu bele distribui apoiu iha tempu badak.

Prezidente Repúblika espresa ninia esperansa ne’e, tanba iha fulan rua nia laran negosiante barak liuliu negosiante kiik sira hapara ka hamenus sira-nia atividade fila-liman no iha tempu susar nia laran iha espíritu solidariedade komunidade sira atu fó tulun ba malu mka’as.

“Loos duni katak, iha fulan rua nia laran negosiante barak liuliu negosiante kiik sira hapara ka hamenus sira-nia atividade fila-liman. Maibé,  iha tempu susar ne’e,  ita mós haree espíritu solidariedade sae maka’as husi emprezáriu sira, organizasaun sosiedade sivíl, konfisaun relijioza no ema ida-idak, ho insiativa rasik fó tulun ba malu. Ha’u hatene katak apoiu hosi Governu la to’o lalais ba populasaun no ba empreza sira. Situasaun ida-ne’e hamosu krítika oin-oin. Ha’u hein katak Governu aserta ona dadus no bele ona hato’o apoiu liuliu ba ita-nia ema vulnerável sira iha tempu badak,” dehan PR Lú Olo liuhosi mensajen ba povu Timor-Leste kona-ba renovasaun Estadu Emerjénsia datoluk iha Palásiu Prezidensiál Bairru Pité, Dili, kinta ne’e.

Nia hatutan, PR hatene katak ajénsia nasional no internasional sira mós hato’o ajuda oin-oin ba komunidade no ajuda sira-ne’e akontese enkuantu Governu prepara mós pakote ekonómiku hodi ajuda uma-kain kbiit-laek no apoia empreza privadu atu traballadór sira labele lakon empregu ka saláriu.

Nia dehan, maski liu ona fulan ida Timor-Leste laiha ona kazu COVID-19 pozitivu, Timor-Leste bele ona ka lae hakotu Estadu Emerjénsia, ida ne’e hamosu reasaun oin-oin tanba timoroan sira liuliu sira ne’ebé moris ho negósiu fila-liman labele hala’o sira-nia atividade baibain hodi sustenta-aan no sustenta família.

Tanba ne’e, Xefe Estadu husu ba Governu, Parlamentu Nasionál no Prezidente Repúblika tau neon hamutuk atu haree oinsá proteje nafatin povu iha territóriu tomak. Órgaun Soberania tolu ne’e haree hanesan Timor-Leste sei iha hela risku laran, enkuantu moras COVID-19 sei la’o nafatin iha mundu tomak liuliu iha País belun sira no viziñu Repúblika Indonézia.

Nia informa, relatóriu ne’ebé aprezenta hosi Sentru Integradu Jestaun Krize ba Konferénsia Inter-Ministeriál no lori ba Konsellu Ministru mak mosu proposta hosi Governu haruka ba Prezidente Repúblika iha 25 maiu 2020 atu hatutan Estadu Emerjénsia datoluk.

Tuir Konstituisaun haruka, Prezidente Repúblika konsulta nia órgaun rua, Konsellu Superior Defeza no Seguransa no Konsellu Estadu, iha loron 26 maiu 2020. Hafoin rona opiniaun a-favór hosi órgaun konsulta rua ne’e,  Prezidente Repúblika haruka kedas pedidu autorizasaun ba Parlamentu Nasional. Órgaun Estadu ida ne’e, hafoin diskute klean no tetu didi’ak, deside fó autorizasaun ba Prezidente Repúblika renova Estadu Emerjénsia.

“Nune’e, hafoin hatuir prosedimentu legál hotu no ho kbiit ne’ebé Konstituisaun RDTL fó ba Prezidente Repúblika, ha’u dekreta horisehik atu renova Estadu Emerjénsia, hahú ohin 28 maiu 2020, 00:00 no sei ramata minutu ida, molok meia-noite, iha loron 26 juñu 2020,” nia dehan tan.

Governu mak sei foti medida espesífiku, atu la husik moras COVID-19 tama tan iha Timor-Leste no karik tama, sei foti medida oinsá de’it atu moras ne’e labele da’et ba komunidade liuhosi medida prevensaun no kontensaun.

Xefe estadu sita artigu 44 Konstituisaun RDTL fó direitu, liberdade no garantia ba sidadaun sira. Purezemplu, sidadaun ida-idak iha direitu no liberdade atu halo movimentasaun, lao ba mai iha Timor-Leste tomak, tuir ninia hakarak no nesesidade.

Artigu ne’e fó mós direitu ba sidadaun ida-idak  tama  no sai hosi Timor- Leste iha tempu ne’ ebé de’it, tuir hakarak no nesesidade ne’ebé de’it.

Direitus sidadaun sira-nian hatama iha Konstituisaun liuhusi artigu oin-oin. Laiha lei seluk ka ema ka partidu ka organizasaun ne’ebé bele hasai, limita ka suspende direitu sira-ne’e.

Ho de’it Deklarasaun Estadu Emerjénsia hosi Prezidente Repúblika, ne’ebé bazeia ba artigu 25 Konstituisaun RDTL, mak bele suspende ka limita direitu, liberdade no garantia ne’ebé Konstituisaun fó ba sidadaun sira.

Notísia Relevante: PR Lú Olo: “Renovasaun Estadu Emerjénsia Atu Salva Povu”

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here