Vise Ministru Edukasaun Juventude no Desportu, João Zacarias. Imajen/ Egas Cristovão

DILI, 29 maiu 2020 (TATOLI)-Vise Ministru Edukasaun Juventude no Desportu, João Zacarias Freitas Soares, hateten halo ona enkontru ho dirijente hahú husi Diretór Jerál no Nasionál sira hodi ko’alia kona-ba planu atu re-abertura prosesu aprendijazen ba estudante sira iha tempu badak.

“Ha’u halo ona enkontru ho dirijente sira liliu dirijente sira ne’ebé maka durante estadu emerjénsia halo servisu hamutuk  ho Ministériu Saúde atu akompañia nafatin prosesu re-ativa eskola sira,”dehan Vise Ministru Edukasaun ne’e, ba TATOLI, kinta (28/05/2020).

Iha enkontru ne’e sira mós deskute kona-ba regra distánsiamentu sosiál, fizíku no seluk tuir rekomendasaun Organizasaun Saúde Mundiál no Ministériu Saúde hodi implementa bainhira prosesu aprendijazen la’o filafali iha territóriu Timor-Leste.

“Ha’u husu atu dirijente sira tenki hatene mós ba regra sira hodi banati tuir,” nia hatutan.

Tuir Governante ne’e katak iha posibilidade MEJD sei hahú re-abertura  ona prosesu aprendijazen ba estudante sira iha tempu badak.

Tanba Xefe Governu, Taur Matan Ruak mós anúnsia ona  Parlamentu Nasionál foinlalais katak estadu emerjénsia ba dala tolu ne’e konsentra de’it ba movimentu sira iha fronteira terrestre, aeroportu, portu.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here