Ministru Agrikultura Peska sesante, Joaquim José Gusmão dos Reis Martins konvoka reuniaun ikus ho funsionariu, iha Sala reuniaun MAP, Comoro, kinta (28/05). Imajen/Mídia-MAP

DILI, 28 maiu 2020 (TATOLI) – Ministru  Agrikultura Peska sesante, Joaquim José Gusmão dos Reis Martins, halo despedida ikus ho diretór, kargu xefia, inklui funsionáriu Ministériu Agrikultura no Peska (MAP) no husu kontinua kolabora nafatin ho ministru foun nune’e bele dezenvolve instituisaun di’ak liután.

Pedro dos Reis ne’ebé indijitadu husi Partidu Kmanek Haburas Unidade Nasionál Timor-oan (KHUNTO) sei okupa kargu Ministru Agrikultura Peska hodi substitui Joaquim.

“Governasaun ne’e lideransa troka maibé polítika tenke ser la’o nafatin, tanba presiza iha kontinuidade polítika ne’ebé maka ita hala’o ona“, dehan Ministru Joaqim ba Agência Tatoli hafoin halo reuniaun ikus ho funsionáriu MAP, iha Salaun MAP, Comoro kinta ne’e.

Nia parte husu dirijente sira iha MAP hodi trasa planu ne’ebé iha ona tanba objetivu maka atu hadi’a povu agrikultór sira nia moris.

“Enkoraja nafatin katak ministru bele troka tanba polítika, maibé na’in ba ministériu ne’e maka Diretór no Xefe Departementu sira. Tanba ne’e susesu husi ministeriu ne’e iha sira nian liman”, nia akresenta.

Relatóriu servisu durante servisu tinan-rua, ministru sesante prepara ona hodi entrega ba membru governu foun ne’ebé sei substitui ninia kargu, nune’e bele dezenvolve MAP sai di’ak liután.

“Ha’u sei aproveita tan relatóriu fulan-janeiru to’o maiu, hodi relata kona-ba saida de’it maka durante ne’e  halo  no servisu saida saida de’it. Hakarak hato’o ba ministru foun kona-ba ita-nia lala’ok setór agrikultura ne’e to’o iha ne’ebé no ha’u husu sé bele kontinua”, nia relata.

Kona-ba progresu saida maka iha  tinan-rua nia-laran konsege halo, eis governante ne’e rekoñese desde tinan-2018 seidauk konsege halo buat barak tanba uza osan duodésimu, enkuantu iha tinan-2019 bainhira iha orsamentu normál konsega tenta hasa’e produsaun maibé osan maka limitadu atu halo intervensaun.

“Ita nia eskema irigasaun atu hasa’e produsaun hare nian, ita mós ba dahuluk hafoin Timor-Leste hetan independénsia, konsege halo sensu agríkola atu ita bele hatene populasaun uma-kain hira maka servisu loloos iha área agrikultura no daudaun ne’e kompletu ona atu ofisialmente hein nia lansamentu”, hateten Joaquim.

Parte ida mós, MAP servisu hamutuk ho Banku Mundiál konsege husu ba parseiru dezenvolvimentu hodi bele apoiu estensionista ho motorizada hamutuk 50 resin hodi fasilita pesoál sira ne’ebé servisu iha suku inklui iha área floresta.

Nia haktuir, MAP konsege loke área atu kuda ai-kameli, maibé iha área peska nia maka presiza tau atensaun tanba konsidera sei mukit, maski nune’e MAP konsege dezenvolve akuakultura hamutuk ho parseiru dezemvolvimentu inklui halo kolam ikan iha Leohitu.

“Ita hakarak atu aselera buat hotu ne’e imposível,  tanba situasaun maka la permite maibé espera ministru foun mai bele kontinua”, nia salienta.

Iha fatin hanesan,  Diretora Jerál Agrikultura MAP, Maria Odete do Ceu Guterres, hateten nia parte sente kontente bele servisu hamutuk ho Ministru Joquim durante tinan-rua nian-laran.

“Ami sente kontente ho koopersaun servisu durante tinan-rua, ne’ebé ho flabilidade no konsege hatudu progresu iha tinan-rua, maski balun seidauk kompleta maibé espera ba oin hamutuk ho membru governu foun mai  bele mellora di’ak liu tan”, dehan nia.

Tuir dirijente ne’e, maski polítika atuál la’o dinámika maibé nia parte husu nafatin ba ministru sesante atu kolabora nafatin ho MAP, nune’e tempu  ruma bele kontribui hanoin ruma ba instituisaun ne’e.

“Maski polítika nune’e, maibé ami husu nafatin karik Señor Ministru ba servisu iha fatin seluk  maibé labele haluhan MAP, tanba nia nu’udar ema tékniku mós iha agrikultura karik mantein koopersaun ne’ebé iha, nune’e karik iha futuru ami presiza ita bo’ot nia hanoin bele kontribui hanoin hamutuk lori institusaun ne’e la’o di’ak liután, dezeju susesu ba ita bo’ot”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here