Enkontru Ministru Salvador no Dirijente MOP sira. Imajen/Mídia-MOP

DILI, 28 maiu 2020 (TATOLI) – Ministru Obra Públika, Salvador Eugênio Soares dos Reis Pires, konvoka enkontru ho Diretór Jerál no Nasionál sira hodi orienta halo preparasaun ba Proposta Orsamentu Jerál Estadu (OJE) 2020 nian husi kada diresaun no hanoin kedas ona halo preparasaun ba OJE 2021 nian.

Tuir nota ne’ebé Agência Tatoli asesu iha kinta ne’e, iha enkontru ne’e halo mós avaliasaun ba servisu kada diresaun nian liuliu relasaun ho projetu emerjénsia, ba atendimentu no rekoperasaun estragu sira iha área estrada, ponte, eletrisidade no kanalizasaun bee sira durante inundasaun iha Timór laran tomak.

Governante ne’e mós orienta Diretór sira atu hahú estudu no dezeñu detalladu ba projetu ne’ebé sei implementa iha tinan ida-ne’e no iha tinan oin, liuliu projetu estrada no ponte inklui eletrisidade no kanalizasaun bee-moos bainhira OJE promulgadu.

Antes ne’e,  proposta orsamentu 2020 ne’ebé rejeitadu, ba Ministériu Obra Públika (MOP) hamtuk millaun $229.

Husi osan millaun $229 ne’e, alokasaun boot liu ba Diresaun Jerál Eletrisidade (DGE) hodi fornese kombustível ba sentrál eletrisidade Hera no Betano, no pagamentu ba projetu ne’ebé la’o ona.

Orsamentu ne’ebé aloka iha kapitál dezenvolvimentu nian pur volta millaun $24, ba projetu estrada, eletrisidade, bee no saneamentu.

Entretantu, Konsellu Ministru aprova ona kalendáriu, ne’ebé proposta lei ne’e sei analiza filafali iha reuniaun ezekutivu loron 22 jullu 2020 no sei submete ba Parlamentu iha 30 jullu 2020.

Enkontru ne’e partisipa husi Diretór Jerál Administrasaun Finansa, Diretór Jerál Obra Públika Diretora Jerál Eletrisidade, Diretór Jerál Água no Saneamentu, hamutuk ho Diretór Nasionál hotu inklui Diresaun Nasionál Habitasaun no Planeamentu Urbanu (DGHPU).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here