Ministra Edukasaun, Juventude no Desportu Dulce de Jesus Soares .Imajen/TATOLI

DILI, 28 maiu 2020 (TATOLI)-Governu liuhosi Ministériu Edukasaun Juventude no Desportu (MEJD), iha ona planu sei fó uluk formasaun ba profesór sira kona-ba prevensaun COVID-19 antes re-ativa prosesu aprendijazen ba estudante sira hodi prevene transmisaun surtu COVID-19.

Ministra Dulce de Jesus Soares hateten formasaun ne’e sei komesa uluk husi munisípiu fronteira sira hanesan Bobonaro, Covalima no Rejiaun Administrativa Espesiál Oé-Cusse (RAEOA).

“Ami iha ona hanoin ida molok prosesu ensinu aprendijazen normaliza hikas, ami sei halo uluk formasaun ba profesór sira oinsá atu halo prevensaun ba COVID-19. Nomós ami sei halo distansiamentu sosiál no distansiamentu fizíku iha sala aprendijazen,”katak Ministra Edukasaun ne’e ba TATOLI, iha ninia servisu fatin Vila-Verde Dili, kinta ne’e.

Formasaun ne’e importante hodi hasa’e koiñesementu no abilidade profesór sira nian atu oinsá hanorin estudante sira hodi prevene an husi transmisaun surtu coronavirus iha baze.

Governu fó prioridade ba munisípiu tolu ne’e tanba fronteira diretamente ho provinsia Nusa Tenggara Timur Indonézia ne’ebé daudaun ne’e rejista kazu COVID-19 ho númeru aumenta husi loron ba loron ida.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here