Juventude husi Aldeia Asalaino, Suku Fuiluro, Postu Administrativu Lospalos, Munisípiu Lautem, fó apoia solidariedade ba família kbiit-laek iha Asalaino. Imajen/Lídia da Conceição

LAUTEM, 28 maiu 2020 (TATOLI) -Juventude husi Aldeia Asalaino, Suku Fuiluro, Postu Administrativu Lospalos, Munisípiu Lautem, ne’ebé serbisu iha estranjeiru hanesan iha Norte Irlanda, Inglaterra, Australia ho mós iha Timor-Leste, kinta (28/05/2020), hala’o asaun solidariedade hodi fó kontribuisaun nesesidade báziku ba família kbiit-laek hamutuk uma-kain-127 iha Asalaino.

Apoia nesesidade báziku ne’ebé juventude Asalaino sira fó ba sira-nia familia iha knua-laran ne’e, kompostu husi foos, mina bimoli, sabaun, rinso, supermie no masin.

Alarindo Salvador dos Santos, ne’ebé hala’o hela serbisu iha diaspora hateten,  objetivu husi kontribuisaun ne’e atu fó karidade ba kbiit-laek sira durante iha situasaun estadu emerjénsia luta hasoru propagasaun surtu Coronavirus ka COVID-19.

Juventude Aldeia Asalaino. Imajen/Lídia da Conceição

Kontribuisaun no apoia solidariedade ne’e, tuir Alarindo Salvador dos Santos, nu’udar jestu ida atu hametin liu-tan unidade no estabilidade iha aldeia laran.

“Ami fó kontribuisaun ne’e inisiativa husi juventude Asalaino sira iha rai-li’ur no mós iha rai-laran ba kbiit-laek, faluk sira, terseira idade, ho mós   família ne’ebé oan barak ho rendimentu ki’ik,”  hateten Alarindo Salvador dos Santos hodi afirma mós katak, apoiu ne’e bele konkretiza juventude Asalaino sira-nia motto, “Ita Nia Hamutuk Mak Ita Nia Forsa”.

Kontribuinte       : Lídia da Conceição

Editór                 : Francisco Simões

HAKEREK NO HATÁN

Please enter your comment!
Please enter your name here