Primeiru Ministru Taur Matan Ruak wainhira fo tomada de pose ba Presidenti Komisaun Funsaun Publika, Fautino Cardoso no komisaria nain rua iha Palacio Governu, Kinta 28 Maiu 2020.Imajen/Antonio Goncalves

DILI, 28 maiu 2020 (TATOLI)–Prezidente Komisaun Funsaun Públika (KFP), Faustino Cardoso Gomes, hateten programa prioridade ba promosaun nian liuliu kona-ba igualdade jéneru tanba to’o ohin loron kargu hosi dirijente funsaun públika sei domina hosi mane no feto uitoan de’it.

“Tuir ami-nia hanoin katak igualdade jéneru sai prioridade tanba to’o ohin loron kargu hosi dirijente Funsaun Públika sei domina hosi mane no feto uitoan de’it,” dehan Prezidente KFP, Faustino Cardoso Gomes, iha ninia deskursu iha serimonia tomada de pose iha  Palásiu Governu, Dili, kinta ne’e.

Nia hatutan, nomeasaun rekrutamentu bazeia ba méritu no konsege estabelese ona no oinsá kompromete atu halo moderniza nafatin efisiénsia no efikásia funsionamentu administrasaun públika nian.

Nune’e mós, nia dehan, prinsípiu inkluzividade atu oinsá ba oin hakaas-an katak pesoais portadores no defisiénsia sira bele hetan asesu no asegura ba dezenvolvimentu kareira nian iha funsaun públika no oinsá mak fó importánsia ba desentralizasaun rasik.

“Maibé hau-nia hanoin durante ne’e ita halo buat barak ona maibé komunikasaun koordenasaun ba oin importante tebes. Ita iha ámbitu reforma labele monu matak iha ideia sira ne’ebé mai hosi liur maibé oinsa mak konstetualiza kontestu situasaun ita-nian,”  nia dehan.

Prezidente KFP hateten prinsípiu suatentabilidade, funsionalidade estrutura administrativa tenke tau atensaun maka’as bainhira halo re-estrutura iha Munisípiu.

“Ida fali ita konta katak ita-nia osan depende de’it mina-rai tanba ne’e prinsípiu sustentabilidade, funsionalidade estrutura administrativa ita tenke tau atensaun maka’as bainhira ita halo re-estrutura iha ámbitu sesentralizasaun ba to’o Munisípiu sira,” nia esplika.

Tuir nia, iha nivél Nasionál ema hotu komprende katak desentralizasaun la’o tiha ona liuliu administrasaun indireta sira. Ministériu sira, klaru sira halo direita iha Primeiru-Ministru nia kompeténsia tomak maibé mekanizmu delegasaun kompeténsia durante ne’e la’o hela no ba oin kontinua masimiza ida-ne’e, maibé presiza halo komunikasaun no koordenasaun nune’e oinsá halo efikásia ba kestaun ida-ne’e.

Tanba programa VIII Governu konstitusionál nian hatudu momoos efisiénsia, efikásia, profesionalizmu no modernizasaun administrativa mak sei alvu prinsipál no KFP sei kompromete atu oinsa planu Governu ida ne’e bele realiza.

“Durante ne’e aplika ona pursentu konkursu eletróniku ba rekrutamentu ba kargu diresaun xefia maske seidauk másimu tanba ita realistiku evulusaun polítika, impase polítika, osan duodésimu ne’ebé mak labele permite kontinuidade implementasaun polítika. Ne’ebé maioria kargu to’o agora sei hein komisaun nia servisu. Nune’e ita enkoraja ba oin halo koordenasaun ho Ministériu sira oinsa mak ho ida-ne’e ho didi’ak,” nia haktuir.

Notísia Relevante: Primeiru-Ministru Nafatin Fó Konfiansa Ba Faustino Cardoso Sai Prezidente KFP

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here