Embaixadór Timor-Leste ba Japaun, Ilídio Ximenes da Costa, hasoru malu ho eis Embaixadór Japaun mai Timor-Leste, I Wao Kitahara, hodi diskute kooperasaun serbisu. Imajen/Embaixada TL iha Japaun

DILI, 28 maiu 2020 (TATOLI) – Eis Embaixadór Japaun mai Timor-Leste, I Wao Kitahara, afirma ninia kometimentu hodi ajuda no fasilita Timor-Leste liuhusi Ministériu Turizmu bele partisipa iha Expo Turizmu ne’ebé sei hala’o iha Japaun.

Notísia Relevante : Embaixadór Ilídio Ximenes Komunika ho Setór Privadu Japaun Atu Mai Investe iha TL

Embaixadór Timor-Leste ba Japaun, Ilídio Ximenes da Costa dehan, programa espozisaun turizmu ne’e sei hala’o iha outubru 2020, maibé ajenda ne’e, sei depende ba situasaun pandemia COVID-19.

“Ha’u kontinua kria mós kooperasaun bilaterál ko’alia ho eis Embaixadór Japaun ba Timor-Leste, I Wao Kitahara, iha planu di’ak suporta Timor-Leste atu partisipa espozisaun kona-ba turizmu nian fulan outubru 2020,” informa Ilídio Ximenes ba Ajénsia Tatoli via mensajen WhatsApp, kinta (28/05/2020).

Eis Sekretáriu Estadu Polítika Formasaun Profisionál no Empregu (SEPFOPE) iha  V Governu Konstitusionál ne’e promete depois Japaun deklara livre COVID-19 maka nia parte sei kontinua hasoru governu no empreza boot sira iha Japaun hodi oinsá bele mai investe iha Timor-Leste.

Ilídio dehan, eis embaixadór I Wao Kitahara, rasik halo diskusaun hodi NIPON-Timor-Leste nia naran oinsá bele organiza Expo Turizmu Japaun 2020, OKINAWA RESORT, Forum no Exehibisaun.

Expo Turizmu Japaun 2020, Okinawa oferese oportunidade negósiu ne’ebé iha valór liubá profisionál sira iha setór turizmu ho variedade oi-oin ne’ebé sai fokus ba sira hanesan área Turizmu Peska no Natureza.

“Ida ne’e hanesan oportunidade osan mean ida ba Timor-Leste atu halo promosaun ba rekursu naturaís iha setór turizmu,” Ilídio Ximenes hateten.

Eis Embaixadór I Wao KITAHARA ho nia Asosiasaun LOROSA’E – NIPON prontu atu ajuda embaixada iha programa ida ne’e, maibé nia laiha finansiamentu ba atividade ne’e, tanba ne’e nia sujere ba embaixada atu aloka uitoan orsamentu ba partisipasaun iha atividade ida-ne’e.

Orsamentu ne’ebé nia sujere mak $50,000.00. Parte embaixada ho asosiasaun mós hein hela partisipasaun Ministériu Turizmu no Komérsiu Timor-Leste iha eventu internasionál ida-ne’e.

Nia hatutan, prezensa Timor-Leste iha eventu ne’e sei fó impaktu pozitivu ba kooperasaun trilateral entre Timor-Leste, Japaun no Indonézia iha setór Marítima, Turizmu no Peska.

Jornalista   : Eugénio Pereira 

Editór        : Francisco Simões

HAKEREK NO HATÁN

Please enter your comment!
Please enter your name here