Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 28 maiu 2020 (TATOLI) –   Dadus situasaun nasionál Coronavirus ka COVID-19 ne’ebé fó sai husi Sala Situasaun Sentru Integradu Jestaun Krize (SS-CIGC, sigla portugés) to’o kinta (28/05/2020), tuku 12:00 Otl, katak, abitante hamutuk na’in-74 mak sei iha konfinamentu obrigatóriu ka kuarentena.

Notísia Relevante : COVID-19, TL Tama Lista Númeru Mate Zero iha Sudeste Aziátiku

Husi total númeru ne’e, na’in-64 iha fasilidade governu nian iha Dili no na’in-10 mak hala’o konfinamentu obrigatóriu iha fasilidade governu nian iha munisípiu seluk.

Portavós CIGC nu’udar mós Koordenadór Ligasaun Ofisiál ba Forsa Tarefa COVID-19, Rui Maria de Araújo, liuhusi konferénsia imprensa iha Sentru Mídia CIGC iha Sentru Konvensaun Dili (CCD), relata katak, daudaun ne’e abitante ne’ebé liu ona  (pasa) auto-kuarentena iha na’in-2,311, kompostu husi na’in-1,809 iha Dili no na’in-502 iha munisípiu seluk.

Eis Ministru Saúde no eis Primeiru-Ministru ne’e klarifika tan katak, total kumulativu ezame laboratóriu 1,565, total kumulativu hein rezultadu iha sia (9), númeru kumulativu kazu konfirmadu 24, kazu konfirmadu foun laiha (0), total kumulativu rezultadu laboratóriu negativu 1,532, númeru kazu baixa laiha (0) no númeru rekuperadu ona 28 (konfirmadu 24 no provavel 4).

“Total kumulativu amostra husi tirajen 63 (100% negativu), total kumulativu amostra husi vijilánsia sentinela 820 (100% negativu),”  informa Rui Maria de Araújo liuhusi konferénsia imprensa-ne’e.

Aproveita mós esplika ka salienta pontu hitak hanesan tuir mai ne’e; 1). Hakarak fó hanoin-hikas ba públiku katak, Prezidente Repúblika, Francisco Guterres “Lú Olo” dekreta ona estensaun Estadu  Emerjénsia ba fulan ida tan. Tan ne’e, SS-CIGC apela ba populasaun tomak atu nafatin kolabora ho governu hodi implementa medida distansiamentu sosiál individual no koletivu hanesan bai-bain.

2). Haree husi nivel alerta no resposta ne’ebé governu Timor-Leste adopta ba prevensaun no metigasaun COVID-19 iha Timor-Leste, hahú dia 15  maiu, ita sai husi faze ne’ebé hanaran ALERTA 3 ka faze ‘’metigasaun’’, ba fali faze ne’ebé hanaran alerta ida (1) ka faze ‘’Kontensaun’’.

“Ita sai husi Alerta 3 hodi fila ba Alerta 1, tamba maski iha Timor-Leste la iha ona kazu ativu, ita nia viziñu ne’ebé halo fronteira terrestre ho ita, ninia kazu detetadu aumenta beibeik (to’o ohin iha 85 kazu, na’in-tolu (3) iha Kabupaten Timor Tengah Selatan. Fonte online), inklui mós kazu óbitu ida (1) ka kazu ne’ebé mate tanba COVID-19,” informa Rui Araújo.

3). Aproveita oportunidade atu informa mós ba populasaun tomak katak, sei nafatin iha sidadaun Timor-Leste ne’ebé klandestinamente hakaat-liu rai-ketan, husi Indonézia mai Timor-Leste ninia territóriu. Iha períodu loron sanulu ikus (21/5 – 28/5), total iha ema-12 maka hakat klandestinamente iha rai-ketan. Husi total ne’e, na’in-ida (1) ema Indonéziu no deporta kedas ba fali Indonézia, iha Batugade ema na’in-rua (2), Salele (ema 1), Oesilu (ema 5), no na’in-tolu (3) iha ona Dili maka komunidade informa ba autoridade lokál.

Estadu-Maiór Konjuntu, Sala Situasaun CIGC, husu ba populasaun tomak, liu-liu ba sira iha munisípiu Covalima, Bobonaro no RAEOA, atu nafatin tuur hakmatek iha ida-idak nia fatin, no labele hakat-ba-mai iha rai-ketan ho Indonézia, hodi nune’e, la monu ba risku, hetan da’et moras COVID-19, no lori mai hada’et tutan iha Timor-Leste nia laran.

Rui Araújo afirma tan, F-FDTL ho PNTL sei nafatin fó apoiu ba malu no liuhusi mós kolaborasaun ho autoridade komunitária sira, sei nafatin halo vijilánsia másima iha dalan klandestinu sira hotu, iha rai-ketan entre Timor-Leste ho Indonézia.

“Di’ak-liu tuur hakmatek iha uma” afirma Rui Araújo hodi informa mós (4) ba populasaun tomak katak fasilidade saúde iha Ministériu Saúde ninia tutela, iha territóriu laran tomak, sei nafatin hala’o prosesu triajem, no vijilánsia sentinela, iha períodu estensaun Estadu Emerjénsia hodi bele deteta lalais kazu foun ruma, iha komunidade nia-leet.

“To’o ohin, husi total amostra ba análize laboratóriu ne’ebé foti iha prosesu triajem no vijilánsia sentinela iha territóriu laran tomak (hamutuk 883 amostra), 100% hatudu rezultadu negativu,” tenik Rui Araújo.

5). Tuir mai SS-CIGC hakarak fó hanoin hikas ba populasaun tomak katak hotu-hotu tenke nafatin uza máskara. Máskara iha oin rua: Máskara sirúrjika, no máskara halo-rasik ka ita bolu máskara kazeira. Máskara ninia funsaun maka atu tahan netik mear-tasak ka kaben-tasak labele naklekar ba ema-seluk, no husi ema-seluk labele kona ita.

“Ema hotu tenke uza máskara iha fatin públiku, no liu-liu bainhira iha fatin ne’ebé ema barak hanesan fatin selebrasaun relijioza, loja, merkadu, fasilidade saúde sira, no seluk tan. Uza máskara tenke taka didi’ak inus ho ibun, la’ós tara fali máskara iha kakorok,” Rui Araújo afirma tan.

Nia esplika, bainhira uza máskara ho disiplina no loloos,  bele kontribui maka’as tebes atu hadook moras COVID-19 husi aan-rasik  no mós husi ema-seluk.

Rui Araújo lori SS-CIGC nia-naran hakarak apela ba populasaun tomak, liu-liu joven sira, maski Timor-Leste fila ba Alerta ida (1), ka faze Kontensaun, husu atu nafatin kolabora no kumpre ho disiplina regra distansiamentu sosiál koletivu, uza nafatin máskara, bainhira sirkula iha fatin públiku no fatin ne’ebé iha ema barak, hanesan fatin selebrasaun relijioza, loja, serbisu fatin, basar no seluk tan. Fase liman beibeik, no evita kose liman ba ibun, inus no matan.

 Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here