Imajen Espesiál.

DILI, 28 maiu 2020 (TATOLI)—Bankada Congresso Nacional da Reconstrução de Timor (CNRT) preokupa ho prinsípiu Partidu Kmanek Haburas Unidade Nacional Timor Oan (KHUNTO) no Partido Democrático (PD) tanba kuadru sira foti desizaun koletiva liuhosi konferénsia no kongresu maibé to’o ikus ba fali plataforma seluk.

Vise-Xefe Bankada CNRT, Deputadu Patrocínio dos Reis Fernandes, hateten nia akompaña karta Prezidente Partidu Democrático (PD), Mariano Assanami Sabino ne’ebé espalla no hato’o ba Prezidente Partidu CNRT kontinua apoia kualkér governu tanba PD iha opsaun polítiku ligadu ba konjuntura polítika foun hodi buka podér.

“PD “sai” ne’e sira-nia opsaun polítiku ligadu ba konjuntura polítika foun tanba ohin-loron ema hotu-hotu hakarak podér. Agora politikamente konjuntura foun tanba iha dinámika polítika, sé mak kontribui depois la prenxe fali maioria parlamentár ne’e propria partidu rua (KHUNTO no PD) ne’e rasik, ne’ebé halo ‘traisaun’ ba koligasaun. Maibé ne’e normal. Ne’e mak polítika hodi eduka jerasaun foun. Ida-ne’e mak prinsípiu partidu sira-nian,”  Deputadu Patrocíno dos Reis Fernandes, informa ba jornalista sira, iha resintu Parlamentu Nasionál, kinta ne’e.

Nia dehan, prinsípiu partidu CNRT defende no respeita lei, konstituisaun no lei sira-ne’e orienta lala’ok estadu nian iha kualkér tempu no kualkér momentu.

Deputadu ne’e afirma, resposta ba PD hanesan mós CNRT fó resposta ba KHUNTO nian tanba partidu sira envolve iha koligasaun tuir lei partidu polítiku nian, depois atu sai tenke halo konferénsia ka kongresu ruma no óragun deliberativu partidu nian.

Nia hateten, PD ne’e Partidu Demokrátiku, nia rasik la valoriza valór demokrátiku iha partidu laran tanba desizaun ida mai hosi konferénsia maibé prezidente partidu rasik ba invalida tiha fali desizaun konferénsia ninian, ne’e lamentável uitoan maibé prontu opsaun polítiku ne’e normál.

“Úniku akordu ne’ebé mak kesi ne’e maka akordu ida koligasaun. Tanba, molok to’o asina koligasaun ne’e formaliza liuhosi konferénsia ka kongresu. Ezemplu hanesan KHUNTO nia kongresu, PD nia konferénsia mós hamutuk ho CNRT. Ita hatene katak órgaun aas liu mak partidu mak konferénsia ka kongresu,” nia hateten.

Hatán ba kestaun ne’e, Membru Deputadu KHUNTO atuál Segundu Vise-Prezidente Parlamentu Nasionál, Deputadu Luis Roberto, konsidera deklarasaun bankada CNRT nian ladún relevante ba situasaun polítika atuál.

“CNRT dehan ami mak ‘traidór’ ba koligasaun ne’ebé lidera hosi señor Xanana Gusmão, maibé ita hatene katak Timor-Leste adapta sistema demokrasia no nasaun demokrátiku. Ha’u fiar katak partidu CNRT hatene kl’ean liu kona-ba regra no lei sira. Iha rai-ida-ne’e, liberdade ba partidu polítiku hotu-hotu hili dalan ne’ebé mak di’ak ba partidu idak-idak ninia futuru. Laiha lei ida kesi partidu ida nia afiliasaun,” Deputadu Luis Roberto hateten.

Nia haktuir, horiuluk kedas PD no KHUNTO husu ona partidu boot rua tantu CNRT no FRETILIN hodi fó solusaun ba inserteza polítiku ne’e maibé realidade laiha, entaun hakarak husik de’it estadu no povu moris terus.

“Se dehan partidu sira tuur hakmatek katak labele halai ba-mai ne’e entaun ami husu para partidu boot sira kria kondisaun. Kondisaun mak saida. Ha’u hanoin partidu kiik sira la presiza hanorin partidu boot sira. Se partidu boot la kria kondisaun konserteza partidu kiik sira halai-sees buka dalan tún-sa’e. Ne’ebé, lalika fó todan ba partidu kiik sira, ne’e labele. Aman nasaun sira mós presiza halo reflesaun ba sira-nia aan,” nia dehan.

Notísia Relevante: Assanami: “PD Apoia Kualkér Governu no Hakuak Boot Ba Maun Xanana”

Jornalista : Evaristo Soares Martins

Editór       : Cancio Ximenes    

HAKEREK NO HATÁN

Please enter your comment!
Please enter your name here