Ministru Obra Públika Salvador Eugênio Soares dos Reis Pires. Imajen Tatoli/Egas Cristovao

DILI, 27 maiu 2020 (TATOLI) – Ministru Obra Públika, Salvador Eugênio Soares dos Reis Pires, informa Ministériu Obra Públika (MOP) hatama ona proposta ho montante $100.000 atu fó subsídiu ba tékniku Eletricidade de Timor-Leste (EDTL) no Diresaun Jerál Água no Saneamentu (DGAS, sigla portugés), maibé sei hein aprovasaun husi Komisaun Jestaun Fundu COVID-19.

“Ami aprezenta ona proposta ba Fundu COVID-19, maibé depende ba aprovasaun Jestaun Fundu COVID-19, ne’ebé resposabiliza husi Ministériu Saúde, Ministériu Finansa no Ministériu Negósiu Estranjeiru no Kooperasaun”, tenik Ministru Salvador ba Agência Tatoli, iha resintu Parlamentu Nasionál (PN), kuarta ne’e.

Tuir governante ne’e, parte ministériu hatama de’it proposta, maibé Komisaun Jestaun Fundu COVID-19 maka deside no halo aprovasaun

Salvador esplika, proposta MOP hamutuk $100.000 tanba fahe ba diresaun rua hanesan EDTL ho tékniku na’in-340 no DGAS na’in-140 no tuir kálkulu kada tékniku EDTL no DGAS sei hetan subsídiu $5 loron-ida, konta husi implementasaun Estadu Emerjénsia (EE) ne’ebé liga ho prevensaun no kombate surtu COVID-19.

Notísia Relevante: Orsamentu Millaun $150 Aloka ba Ministériu no Instituisaun Hamutuk 13 Hahú Bele Ezekuta

Ministru ne’e esplika, subsídiu ne’e ninia kritériu prinsipál mak ba liña frente sira ne’ebé mak servisu no presta nafatin sira nian responsabilidade atu asegura servisu esensiál sira iha períodu EE.

Parte seluk, subsídiu ba funsionáriu tékniku iha área esensiál sira aprova no hetan ona promulgasaun husi Prezidente Repúblika.

“Tékniku sira ne’e iha nível barak liu ho saláriu mínimu ne’ebé kada fulan $115, maibé sira mós aposta ba risku COVID-19. Kuandu água no saneamentu inklui eletrisidade hetan avaria ruma sira tenke halo atendimentu”, nia akresenta

Entretantu totál orsamentu millaun $250 ne’ebé aprovadu iha PN hamutuk millaun $150 sei aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no husi millaun $150 ne’e, aloka $500.000 ba Parlamentu atu dezenvolve polítika no programa iha ámbitu prevensaun no kombate surtu COVID-19.

Konsellu Jestaun Fundu COVID-19 deklara ona, hahú 28 abríl, orsamentu ba instituisaun hamutuk 13 bele hahú ezekuta ona.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here