Membro Deputado FRETILIN, David Dias Ximenes “Mandati”. Imajen/Egas Cristovão

DILI, 27 maiu 2020 (TATOLI)— Reprezentante Povu iha Uma Fukun Parlamentu Nasionál, afirma situasaun no atuasaun iha implementasaun Estadu Emerjénsia (EE) tenke balansu tanba durante fulan-rua povu laiha no susar ba hahan.

Membru Bankada FRETILIN, Deputadu David Dias Ximenes, konsidera estesaun EE pertinente maibé atusaun Governu nian hodi fahe subsídiu ba povu mós tenke emerjénsia.

“Atuasaun labele normál hela de’it. Atuasaun tenke emerjénsia hotu. Ita limita ona populasaun buka rendimentu, ita tenke iha altertinativa nune’e povu labele hamhala. Ne’ebé, situasaun ne’e emerjénsia, atuasaun mós tenke emerjénsia,” Deputadu FRETILIN, Deputadu David Dias Ximenes afirma liuhosi plenária, Parlamentu Nasionál, kuarta ne’e.

Entretantu, Xefe Bankada PD, Deputada António da Conçeicão, hateten estensaun EE daruak nian ladún la’o di’ak tanba movimentasaun públiku maka’as tebes.

“Ministra Solidariedade Sosiál ni Inkluzaun dukur liu, tanba servisu sosiál barak paradu no promesa $100 dolar to’o agora la realiza maske fulan rua hotu ona. Ohin ita ko’alia estende Estadu Emerjénsia, grave liu mak virus polítika la’ós coronavirus. Se coronavirus ladauk ameasa iha ita-nia rain, ita presiza hametin mak relasaun bilateriál ho indonézia hodi halo restrisaun iha ita-nia fronteira, ita la presiza halo EE hodi hamate ekonomia rai laran,” nia dehan.

Tuir nia observasaun, durante implementasaun EE fulan-rua halo terus povu tanba ekonomia rai-laran la la’o.

Xefe Bankada KHUNTO, Deputadu António Nobre Tilman, hateten Timor-Leste konsege elimina ona coronavirus maibé mantein medida prevensaun nune’e transmisaun labele tama mai.

“Ita seidauk manan hasoru pandemina COVID-19, ita só manan iha ita-nia responsabilidade no mantein ita-nia unidade. Ami-nia preokupasaun mak ne’e ita-nia ekipamentu, médiku sufisiente ona ka lae hodi enfrenta situasaun iha tempu oin mai,” Deputadu António Nobre Tilman hateten.

Vise-Xefe Bankada PLP, Deputadu Francisco Vasconcelos, hateten implementasaun tarde tanba regra hosi fundu COVID-19 kesi governu.

“Ida-ne’e mak sai problema ba implementasaun Estadu Emerjénsia,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here