Sekretáriu Estadu Ambiente, Demétrio do Amaral de Carvalho, hamutuk komunidade Remexio kuda ai-oan iha Jardin Francisco Xavier do Amaral, iha Remexio hodi komemora loron mundiál Biodiversidade. Imajen/Mídia SEA

DILI, 27 maiu 2020 (TATOLI) – Iha selebrasaun loron mundiál Biodiversidade ne’ebé monu iha loron 22 maiu, ekipa husi Sekretaria Estadu Ambiente (SEA) desloka ba Munisípiu Aileu, Postu Administrativu Remexio hodi halo atividade kuda ai-oan hamutuk 130 iha Jardin Botánika Francisco Xavier.

Sekretáriu Estadu Ambiente, Demétrio do Amaral de Carvalho, iha ninia diskursu hateten, opsaun hili Remexio ba atividade ne’e ne’e tanba fatin ne’e istóriku.

“Ami halo diskusaun oituan ho hanoin atividade ne’e atu halo nusa no halo iha ne’ebé? Entaun hafoin tetu deside hili Remexio ho razaun ezisténsia Postu Remexio ho Jardin Botánika Francisco Xavier do Amaral, hanesan ita-nia Prezidente Repúblika dahuluk”, dehan  Sekretáriu Estadu Demétrio Demétrio, hafoin ramata atividade kuda ai-oan iha Jardin Botánika, Remexio, kuarta ne’e.

Prezidente Francisco Xavier do Amaral hanesan figura sentrál desde inísiu fundasaun Estadu no iha tinan-1975 kuandu Dili rahun, baze rezisténsia dahuluk husi Dili muda ba Remexio molok ba Aileu.

“Entaun fatin ne’ebé ita organiza harii Estadu maka Remexio, tanba ne’e fatin ne’e importante tebes. Orgullu ba ita bo’ot sira hotu, maibé atu priense orgullu sira ita tenke hafurak fatin ne’e. Tanba ne’e maka ohin ita mai  kuda hela ai-oan iha ne’e”,  dehan governante ne’e.

Sekretáriu Estadu Ambiente, Demétrio do Amaral de Carvalho, hamutuk komunidade Remexio kuda ai-oan iha Jardin Francisco Xavier do Amaral, iha Remexio hodi komemora loron mundiál Biodiversidade. Imajen/Mídia SEA

Biban hanesan, nia parte konvida komuidade Remexio oan sira atu iha sentimentu  nain  hodi bele responsabiliza no kuidadu nafatin jardin ne’e.

“Atu jardin ne’e nia beleza iha nafatin, komunidade hotu tenke sente iha responblidade la’ós  guarda floresta sira de’it maka haree. Komunidade Remexio tomak imi maka mahein, ha’u espera Remexio oan sira ne’ebé foti departementu ambiente iha universidade bele organiza malu  hodi bele tau buat di’ak ba jardin ne’e”, nia akresenta.

Nia nota, jardin ne’e bele sai fatin destinasaun turizmu ne’ebé koñesidu iha Timor-Leste, bainhira iha vontade hamutuk atu proteje no diversifika.

“La’os deit jardin ne’e ba iha ekolojia maibé bele ba benifísiu seluk. Bainhira ita la esforsu atu transforma fatin ne’e maka laiha signifikadu, maibé kuandu ita hakarak transforma jardin ne’e, ita bele iha kapitál ekonomia no sosiál ba Remexio oan sira”, nia rekomenda.

Nune’e, nia parte husu Administradór Postu Remexio hodi komesa haree tau iha planu estratéjiku Postu Remexio nian, nu’udar programa espesiál kona-ba hametin implentasaun Jardin Botánika Francisco Xavier do Amaral.

Tuir governante ne’e, presiza halo mapamentu ba jardin ne’e hodi halo alargamentu tanba daudaun jardin ne’e iha ektare 28 maibé foin maka kuda ai-oan sira iha rai ektare neen.

“Atu atinje ida ne’e no espésie saida maka atu kuda iha jardin ida ne’e, depende ba matenek-nain sira Remexio nian karik bele servisu hamutuk ho ha’u. Hakarak mós enkoraja Diretór biodiversidade, atu ita buka kontaktu posível tinan ida-ne’e ka tinan-oin atu hetan péritu husi Austrália ka fatin seluk, mai Remexio hodi fahe esperiénsia hamutuk ho komunidade ba konservsaun no jestaun ba Jardin Botánika Francisco Xavier do Amaral”, nia akresenta.

Iha fatin hanesan, Administradór Postu Administrativu Remexio, Joanico Mendonça, hateten, nia parte kontente no agradese ba Governu tanba deside komemora loron internasionál  iha Remexio.

“Ami sente kontente no hato’o obrigadu tanba Governu liuhosi Sekretaria Estadu Ambiente bele komemora loron mudiál Biodiversidade hodi kuda ai-oan hamutuk ho komumidade Remexio”, nia salienta.

Jardin ne’e hahú lansa iha tempu Governu daneen, husi Primeiru-Ministru, Rui Maria de Araujo no Ministru Agrikultura no Peskas, Estanislau Aleixo da Silva.

“Hanesan Remexio oan, ami agradese tebes tanba iha jardin botánika ida ho erói nia naran. Husu ita nafatin tau matan asegura jardin ne’e hodi bele iha kontinuasaun no halo netik buat ruma iha jardin ne’e”, nia akresenta.

Entertantu, ai-oan ne’ebé ekipa SEA hamutuk komuidade sira kuda maka hanesan ai-sari, ai-kakeu, Rambutan no Abakate.

Aktividade kuda ai-oan ne’e hetan partisipasaun másimu husi komunidade Remexio, inklui autoridade sivíl no militar iha Postu Remexio.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here