Prezidente Repúblika, Francisco Guterres Lú Olo. Imajen António Gonçalves

DILI, 27 maiu 2020 (TATOLI)–Prezidente Repúblika (PR), Francisco Guterres “Lú Olo” konsidera renovasaun Estadu Emerjénsia importnate tanba haree ba evolusaun situasaun surtu Coronavirus (COVID-19) iha mundu no nasaun viziñu Indonézia.

Prezidente Repúblika Lú Olo hato’o konsiderasaun ne’e, liuhosi mensajen Prezidente Repúblika ba Parlamentu Nasionál kona-ba Renovasaun ba deklarasaun Estadu Emerjénsia ba territóriu nasionál tomak, tuir artigu 85 alínea g) hosi Konstituisaun Repúblika Demokrátika Timor-Leste, hahú hosi  28 -Maiu to’o 26 Juñu 2020.

“Haree ba situasaun nia evolusaun iha mundu, liuliu iha ita-nia nasaun viziñu sira, Prezidente Repúblika konsidera importante tebes halo renovasaun ba deklarasaun estadu emerjénsia,” nia hateten.

Tanba ne’e, Xefe Estadu hato’o agradesimentu kle’an ba sira-ne’ebé servisu iha liña-oin hodi kombate moras COVID-19 maibé la’ós sira ne’e de’it. Atu pesoal liña oin bele servisu di’ak liután, mosu eroi anónimu lubuk ida ne’ebé fó apoiu ba sira. Ba erói anónimu sira-ne’e, nia hato’o mós obrigadu ua’in.

Nia dehan, Organizasaun Mundiál Saúde (OMS) hosi Nasaun Unida deklara iha 11 Marsu 2020 katak moras COVID-19 sai ona pandemia katak da’et ona ba mundu no biar esforsu hotu-hotu, moras ne’e kontinua da’et ba beibeik no hamate ona ema barak no  mate daudaun.

Tanba ne’e mak Governu atu fó protesaun ba saúde públika, hato’o ba Xefe Estadu kona-ba nesesidade atu mantein nafatin mekanizmu hirak ne’ebé adekuadu ba kontrolu epidemolójiku, hodi prevene no hamenus oportunidade atu virus ne’e tama mai Timor-Leste.

“Tanba Timor-Leste la izoladu hosi mundu. Ita tenke matan moris nafatin ba buat hotu-hotu ne’ebé akontese iha área hale’u ita.  Nune’e, bainhira ita tetu risku SARS-CoV-2 bele  tama fila fali iha Timor-Leste no haree medida sra atu hasoru risku sira-ne’e, importante tebes haree ba situasaun epidemiolójika iha Repúblika Indonézia,  nu’udar Estadu úniku ne’ebé iha fronteira internasionál terrestre ho Repúblika Demokrátika Timor-Leste,” nia subliña.

Maski Timor-Leste konsege ona halakon COVID-19 iha territóriu nasionál tomak, nia hatutan, ida-ne’e la signifika katak Timor-Leste livre ona hosi risku ka perigu, tanba númeru kazu infesaun kontinua aumenta babeibeik iha Repúblika Indonézia, liuliu iha Timór Osidentál ne’ebé halo fronteira ho Repúblika Demokrátika Timor-Leste.

“Ha’u fiar katak, ita presiza mantein nafatin medida importante sira ne’ebé la husik virus SARS-CoV-2 tama iha ita-nia territóriu no la husik da’et ba komunidade sira iha territóriu laran tomak. Medida balun mak bandu ema tama iha territóriu nasionál, impoin izolamentu profilátiku obrigatóriu iha kazu balun no medidas kontrolu sanitáriu ho karáter obrigatóriu ba sidadaun sira,” nia dehan.

Medida sira-ne’e foti hodi satan importasaun virus SARS-CoV-2 mai Timor-Leste no, karik la konsege ida-ne’e, la husik virus ne’e  da’et ba komunidade sira.

Medida sira-ne’e hotu, ho deklarasaun Estadu Emerjénsia, maski  atu fó protesaun ba saúde públika,  implika limitasaun ka suspensaun hosi ezersísiu ba direitu no liberdade balun ne’ébé Konstituisaun garante ba sidadaun ida-idak no ba Povu tomak. Maibé,  bazeia ba artigu 25 no. 1, Konstituisaun Repúblika, Prezidente Repúblika iha kbiit hodi  deklara estadu emerjénsia.

“Tuir devér sira-ne’ebé Konstituisaun fó mai ha’u, ha’u rona hanoin sira oovernu no hosi mós Konsellu Superior Defeza no Seguransa no Konsellu Estadu. Konsellu rua ne’e  fó opiniaun a-favor atu hatutan estadu emerjénsia,” nia esplika.

Notísia Relevante: Xefe Estadu Husu Deputadu Sira Hametin Unidade

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here