Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (27/05). Imajen Tatoli/Egas Cristovão

DILI, 27 maiu 2020 (TATOLI) – Reuniaun Konsellu Ministru (KM) ne’ebé realiza iha Palásiu Governu kuarta ne’e, aprova Projetu Deliberasaun Governu ne’ebé aprezenta hosi Primeiru-Ministru (PM), Taur Matan Ruak atu nomea filafali Faustino Cardoso Gomes nu’udar Komisáriu no Prezidente Komisaun Funsaun Públika (KFP) ba mandatu tinan-lima.

Prezidente no Komisáriu KFP na’in-lima simu pose iha loron 30 maiu 2015, nune’e mandatu ne’e sei termina iha loron 28 maiu 2020.

Prezidente Komisaun Funsaun Públika, Faustino Cardoso Gomes. Imajen Tatoli/Egas Cristovão

Nota ofisiál Governu ne’ebé Agência Tatoli asesu, relata katak sei nomea Maria de Jesus Sarmento no Carmeneza dos Santos Monteiro sai Komisária KFP.

Nomeasaun Komisáriu lima KFP husi Governu na’in-tolu no husi Parlamentu nasionál na’in-rua ba mandatu tinan-lima.

Entretantu, reuniaun KM ne’e mós Ministru Koordenadór Asuntu Ekonómiku interinu, Fidelis Manuel Leite Magalhães aprezenta Projetu Rezolusaun Governu, ne’ebé hetan aprovasaun husi ezekutivu sira hodi renova hikas mandatu Arcanjo da Silva nu’udar Diretór Ezekutivu ba Ajénsia Promosaun Investimentu no Esportasaun ba Timor-Leste, IP (TradeInvest Timor-Leste).

Antes ne’e, iha enkontru semanál ho Prezidente Repúblika, Francisco Guterres ‘Lú Olo’, Xefe Governu aprezenta lista membru Governu na’in-neen hodi kompleta estrutura VIII Governu Konstitusionál.

Entre lista hirak-ne’e, Faustino Cardoso okupa kargu Ministru Administrasaun Estatál.

Atuál Komisáriu KFP na’in-lima maka Maria Domingas Alves, Jacinta Bernardo, Maria Olandina Caeiro Alves (troka ba António Freitas) no José Telo Soares Cristovão.

KFP harii iha tinan 2009 no estabelese atu reforsa kapasidade Administrasaun Públika nian no garante katak setór públiku bazeia ba méritu no tuir modelu profisionál ne’ebé aas atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.

Komisaun ne’e mós jere Sistema Informasaun no Jestaun Pesoál nian (PMIS), iha baze-dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.

Daudaun ne’e totál númeru funsionáriu públiku sira nian maka besik 32.000.

Dezde tempu VI Governu Konstitusionál, hahú hapara rekrutamentu funsionáriu permanente sira nian no hahú ona haree filafali kuadru jurídiku, tama mós Lei Funsaun Públika no Estatutu Funsaun Públika nian, hamutuk ho KFP no dirijente sira área rekursu umanu sira-nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here