Membru Governu indijitadu na’in-lima husi Partidu CNRT hala’o enkontru no hato’o karta resignasaun ba Primeiru Ministru, Taur Matan Ruak iha Paláciu Governu, segunda (25/05). Imajen Tatoli/António Gonçalves

DILI, 27 maiu 2020 (TATOLI) – Primeiru-Ministru (PM), Taur Matan Ruak, hateten nia parte apresia tebes ho servisu Membru Governu sira ne’ebé indijita hosi Partidu Congresso Nacional Reconstrução Timorense (CNRT) tanba hatudu disiplina durante mandatu.

Xefe Governu mós afirma, nunka iha intensaun atu demite Membru Governu hirak ne’e, maibé iha parte seluk nia respeita desizaun partidu nian no respeita desizaun pesoál.

Nia konfirma, daudaun ne’e Membru Governu indijitadu na’in-lima husi Partidu CNRT maka hatama ona karta rezignasaun.

“Ha’u laiha intensaun hasai sira tanba ha’u kontente loos ho sira-nia servisu, maibé desizaun partidu nian ha’u respeitu, inklui desizaun sira-nia ha’u respeitu”, hateten PM Taur iha Parlamentu Nasionál, kuarta ne’e.

Notísia Relevante: Membru Governu CNRT Na’in-Lima Hasoru PM Taur, Arsénio: “Desizaun Partidu Tenke Kumpre”

Xefe Governu adianta, karta rezignasaun ne’ebé Membru Governu nain-lima hatama ona, tuir prosesu presiza hetan autorizasaun husi Primeiru-Ministru no husu Prezidente Repúblika dekreta ezonerasaun ne’e mak foin vale, maibé seidauk dekreta sira sei asume pasta nu’udar membru Governu.

“Ha’u kontente loos tanba sira mantein disiplina ida maka’as, mesmu iha diferénsia partidu. Tékniku ne’e hanesan ne’e, tanba ezekutivu ne’e ezekutivu, iha Parlamentu mak halo polítika maibé ami ezekutivu ne’e tuur hamutuk hodi ko’alia”, eis Prezidente Repúblika ne’e salienta.

Entretantu iha segunda (25/05), Membru Governu indijitadu husi Partidu CNRT na’in-lima hasoru no hatama ona karta rezignasaun ba Xefe Governu.

Membru Governu hirak ne’e maka hanesan Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun, Juventude no Desportu, Dulce Soares, Vise-Ministru Administrasaun Estatál, Abílio Caetano, Sekretáriu Estadu Juventude no Desportu, Nélio Isaac Sarmento, no Sekretáriu Estadu Kooperativa, Arsénio da Silva.

Membru Governu sira hasoru Xefe Governu hafoin Prezidente CNRT, Kay Rala Xanana Gusmão deklara liuhosi konferénsia imprensa iha sábadu (23/05) liubá iha sede CNRT, Bairro dos Grilos, katak Membru Governu indijitadu husi partidu, loron ikus atu retira husi VIII Governu maka loron 25 maiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here