Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 27 maiu 2020 (TATOLI)—Bankada Partidu Demokrátiku (PD) husu ba VIII Governu Konstitusionál ne’ebé lidera hosi Primeiru-Ministru (PM), Taur Matan Ruak, hamosu polítika forte ida hodi normaliza hikas ekonomia nasaun ne’ebé monu durante pandemia COVID-19.

“Tenke revive ekonomia país nian, Bankada PD propoin atu Governu halo politika forte ida atu revive no normaliza ekonomia país nian. Bankada PD propoin atu governu tau osan ba Banku sira hodi fasilita setór privadu nasional hamoris no hala’o hikas sira-nia atividade komersiál hodi nafatin fó empregu ba timoroan sira,” Xefe Bankada PD, Deputadu António da Conceição “Kalohan”, informa liuhosi plenária, Parlamentu Nasionál, kuarta ne’e.

Deputadu Kalohan hateten, Timor-Leste la presiza halo Estadu Emerjénsia hodi hamate ekonomia rai laran tanba durante ne’e ekonomia rai-laran monu.

“Ita hakarak proteje ita-nia povu hosi moras Coronavirus maibé hosi fali sorin seluk ita husik ita-nia povu terus no bele mós mate tanba ekonomia ita-nia labele book-aan. Ne’e paradoks tebes. Konkorda atu hola medida restrisaun iha área fronteira maibé labele tan ona Estadu Emerjénsia. Tau regra iha fatin públiku sira no kontrola merkadu sira,” nia dehan.

Nia husu governu tau osan liuhosi koperativa sira atu reforsa kapitál empréstimu membru kooperativa kréditu hodi hala’o atividade negósiu no hamoris indústria kiik sira iha rai-laran.

Nune’e mós, nia dehan, governu presiza hala’o obra sira-ne’ebé karik sosiál hodi lori osan dolar ruma ba postu adminsitrativu no suku sira liuhosi projetu emerjénsia ba reparasaun valeta.

“Hamoos estrada no mós taka estrada ku’ak sira, projetu hanesan $5 kada ema ba servisu oras rua nian sei ajuda atu família sira iha fali kbi’it uitoan hodi rekupera sira-nia moris. Projetu hanesan ne’e importante atu hamosu hikas konfiansa povu nian ba nia ukun na’in sira,”  hateten Xefe Bankada PD.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here