Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (27/05). Imajen Tatoli/Egas Cristovão

DILI, 27 maiu 2020 (TATOLI) – Ministériu Obra Públika aprezenta ba Konsellu Ministru (KM) kona-ba dadus ba intervesaun ne’ebé realiza ona no bele iha nesesidade atu halo rekuperasaun ba obra Estadu hamutuk 28 ne’ebé hetan estragu husi inundasaun hafoin udan boot iha loron 21 no 22 maiu iha parte Leste no Kosta Súl. 

Ministru Obra Públika, Salvador Eugênio Soares dos Reis Pires, informa nia parte aprezenta ona nesesidade hodi halo intervensaun hodi bele rekupera fali estragu hirak ne’ebé provoka husi inundasaun iha munisípiu sira hanesan estraga abitasaun, edefísiu públiku, estrada, ponte no infraestrutura seluk tan Estadu nian.

“Ha’u ohin aprezenta ona dadus ba iha Konsellu Ministru atu iha nesesidade halo rekuperasaun tanba faze normalizasaun ne’e ita halo ona”, tenik Ministru Salvador ba Agência Tatoli iha resintu Parlamentu Nasionál, kuarta ne’e.

Notísia Relevante: MOP-SEPS Aprezenta Estragu no Vítima Dezastre Naturál iha Munisípiu ba KM

Kona ba kálkulu orsamentu rekuperasaun, Ministru adianta seidauk iha kálkulu orsamentu tanba sei iha prosesu indetifikasaun ba estragu inudansaun sira, hafoin bele deside kustu orsamentu.

Hafoin akontese dezastre naturál ne’e, governante ne’e fó  kedan orientasaun ba Diresaun Jerál Obra Públika (DGOP, sigla portugés) no Unidade Jestaun Projetu (PMU, sigla inglés) hodi halo normalizasaun atu fasilita movimentasaun transporte públiku no privadu.

MOP indetifika provizóriu ona estragu estrada, ponte, rede bee inklui eletrisidade ho totál lokalizasaun hamutuk 28 no ekipa sei kontinua halo identikasaun iha parte Leste no Kosta Súl.

Daudaun ne’e, ekipa tékniku husi husi instituisaun rua ne’e kontinua halo indentifikasaun ba obra sira ne’ebé hetan estragu hodi halo estimasaun ba orsamentu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here