Majór Jenerál Lere Anan Timur. Imajen/António Gonçalves

 DILI, 27 maiu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, husu ba veteranu sira atu fó apoiu ba lider nasionál sira hodi buka solusaun oinsa hakotu impase polítika ne’ebé nasaun enfrenta no evita halo deklarasaun sira ne’ebé bele fahe povu, hodi ema seluk aproveita kria instabilidade iha rai-laran.

“Ha’u husu liuliu ba veteranu sira, rezisténsia nia ema sira, lalika kaer polítika fahe ema. Ita mak komesa halo buat ne’e, ema seluk bele aproveita. Ne’e mak ha’u apela ba maluk rezisténsia nia ema, atu kuidadu bainhira ita atu toma pozisaun ruma. Ha’u husu ba veteranu sira atu fó apoiu ba lider nasionál sira hodi buka solusaun oinsa hakotu impase polítika ne’ebé nasaun enfrenta no evita halo deklarasaun sira ne’ebé bele fahe povu,” dehan Lere Anan Timur ba jornalista sira hafoin hala’o audiénsia semanál ho Prezidente Repúblika, Francisco Guterres “Lú Olo” iha Palasiu Prezidensiál Bairru Pité, Dili, kuarta ne’e.

Lider forsa armada ne’e husu mós ba veteranu sira atu labele intervein iha lider sira-nia problema maibé buka atu ajuda sira oinsá solusiona problema ne’ebé iha.

“Ita lalika hatama kanuru-tohar ba ita-nia maun sira-nia problema. Ita ajuda rezolve sira-nia problema labele halo todan tan problema ne’e. Ita ajuda apela ba ita-nia maun sira atu sai mós solusaun ba problema,” nia apela.

Entretantu, Xefe Estadu Maior Jenerál Lere Anan Timur kontinua deklara katak, F-FDTL no PNTL prontu garante soberania estadu no oras ne’e servisu hamutuk iha área fronteira iha ámbitu prevensaun COVID-19.

Jornalista : Cipriano Colo

Editór    : Cancio Ximenes

HAKEREK NO HATÁN

Please enter your comment!
Please enter your name here