Aniceto Guro-Berteni Neves.

Hosi:

Aniceto Guro-Berteni Neves

I. Introdusaun

Hanoin-lisuk so prodús de’it debate ba realidade kontestuál ne’ebé politizadu no polarizadu. Akadémiku/akadémika livremente halo interpretasaun tanba sira iha baze sientífiku ona, maibé ba Foinsa’e sira ne’ebé seidauk ramata sira-nia kursu liuliu iha Universidade, sira bele konfuzaun tanba baze teorítiku seidauk-metin.

Tanba ne’e, Ha’u hahú ho obra ida-ne’e, hahú uluk ho kebra ‘Constitutional Patriotism (lian Alemaña: Verfassungspatriotismus)’ hosi Jürgen Habermas). Ho hanoin ida, pelumenus bele ajuda deskobre esplikasaun ba Pensamentu Sientífiku Constitucional Patriotism hosi Jürgen Habermas ba leitór sira. Liuliu ba otas-nurak no Foinsa’e sira ne’ebé estuda hela iha Universidade ka Institutu Ensinu Superiór-sira inklui estudante-sira iha Fakuldade Siénsia Sosiál-Universidade Nacional Timor Lorosa’e (FSS-UNTL). Tanba se la aprezenta nia istória no substánsia sira dezenvolve tuir kontestu no lakon aprezenta krítika-sira mak la ajuda identifika lakuna (theory gaps) hodi ikusmai prodús prepozisaun no argumentu ne’ebé la konsistente no la koerénsia.

Ha’u hakarak ajuda Foinsa’e Estudante Universitáriu oinsá mak sira prodús opiniaun ka argumentu-sira ho ‘konstrutivu, uza padraun estrutura lójika formál no adaequatio rei et intellectus’.  La’ós de’it iha diskusaun ba pensamentu Sientífiku Constitucional Patriotism hosi Jürgen Habermas, maibé mós ba konseitu-sira seluk durante sira estuda. Foinsa’e  Universitáriu-sira tenki hahú uluk, buka deskobre pensamentu-sira sientífiku antes halo sitasaun no halo konkluzaun. Importante atu hahú koñese no diskute uluk konseitu, antes tama iha prepozisaun hodi forma sira-nia supozisaun, dezenvolve argumentasaun hodi halo konkluzaun.

Ha’u hakarak de’it ajuda Foinsa’e-sira iha Universidade atu dezenvolve, hametin sira-nia kbiit, matenek, koñesimentu no atitude seletiva ida-ne’ebé independente, neutru/imparsiál iha formasaun konseitu, prepozisaun no argumentasaun ba matéria ruma iha sira-nia vida estudantil. Ida-ne’e nu’udar meiu ida oinsá atu hametin Foinsa’e no Universitáriu sira nia fiar iha integrasaun siénsia, teoria no teknolojia iha prosesu harii Nasaun-Estadu iha era modernu no dijitalizasaun iha dezenvolvimentu mundiál nian. Krítika, sujestaun ka opiniaun hosi leitór-sira, ha’u sei uza hodi hariku-tan diskusaun ba konseitu ida-ne’e iha faze ikus-nian. Leitór-sira nia opiniaun (sujestaun ka krítika bele dirije mai ha’u liuhosi e-mail: hatoudoana@gmail.com).

 

II. Dezenvolvimentu Pensamentu Constitucional Patriotism

Jürgen Habermas nasionalidade Alemaña (German), moris iha loron 18 fulan Juñu 1929 iha sidade Dusseldorf, nia boot iha sidade ki’ik ida naran Gummersbach, Alemanlña. Sei otas joven, nia enfrenta esperiénsia hosi funu mundu daruak-nian (loron 1 fulan-Setembru tinan 1939 – loron 2 fulan Setembru tinan 1945) no ukun hosi rezime Adolf Hitler (Janeiru 1933-Setembru 1945) nian momentu ne’ebá. Hosi esperiénsia ida-ne’e, Habermas hanoin kedas ona importánsia hosi sistema demokrasia ida iha nia Nasaun-rasik (Alemaña). Habermas, koñesidu nu’udar filózofu no sosiólogu Alemaña-nian iha tradisaun teoria krítiku no pragmatisismu-nian (tradition of critical theory and pragmatisism). Ninia obra sientífiku foka-liu ba rasionalidade komunikasaun no espasu públiku.

Jan-Werner Muller (2006), iha obra sientifiku ho títulu: Constitucional Patriotism (publika iha tinan 2007), hatete katak Habermas hola papél importante iha dezenvolve, kontestualiza no disemina pensamentu (públika) Constitucional Patriotism ba rai (Nasaun) sira ko’alia lian-inglés. Diferente ho nia anteccessor Dolf Sternberger, Habermas haree Constitutional Patriotism nu’udar reforsu ida ho baze prinsípiu polítiku. Enkuantu Sternberger konsentra iha manutensaun no mantein institutu-sira demokrátiku-nian, Habermas konsentra iha espasu publiku (public sphere) atu manifesta Raciocínio público ba sidadaun-nian.

Lucia Payero (2012) iha obra sientífiku ho títulu ‘Theoretical Misconstructions Used to Support Spanish National Unity: the Introduction of Constitutional Patriotism in Spain” hateten, liu tiha funu mundu daruak no rohan hosi ukun poderozu Adolf Hitler-nian, situasaun post-konflitu ne’e. Habermas hola papél importante ba esforsu normaliza situasaun hosi masakre masivu ne’e. Nu’udar Sientista ka filozofu ida, Habermas influensia hodi impede repetisaun ‘ascensão do nazismo e do holocausto’ ne’e iha Alemaña Weste.

Habermas preokupa ho esforsu atu estabelese identidade Alemaña ne’ebé orgullozu ho sistema tradisionál-sira ‘orgulho nacional tradicional’. Nia propoin atu povu no líder-foun Alemaña-nian hadook-an (ignora) hosi pensamentu ‘harii Estadu-Nasaun Alemaña foun ida ho baze Étniku omojéniku’. Tuir Habermas, formasaun identidade nasionál Alemaña post holocousto defende oinsá buka-hatene atu prevene repetisaun istória-moruk ka nakukun ne’e. Tenki harahun ka halakon istória moruk-nakukun holocousto ne’e ho krítiku. Habermas rekoñese memória-sira hosi funu-mundu daruak no holocausto ne’e importante. Ikusmai, memoria holocausto ne’e sai referénsia prinsipál ba konstrusaun pensamentu Constitucional Patriotism ne’e rasik (Lucia Payero, 2012).

Habermas propoin, Alemaña tenke sai hosi sistema tradisionál-sira ne’e, tanba nia hanoin katak formasaun identidade koletivu nasionalístiku la relevante ona iha mundu ida transformativu sai modernu no globalizadu. Koezaun ho baze étniku nasionál iha sékulu-19 la relevante ona iha períodu ida-ne’ebé akontese daudaun ona imigrasaun internasionál. Funu mundu-daruak no holocousto ne’e fó efeitu ba imigrasaun ho eskalaun boot (Habermas, 1997 no Tonkiss Katherine, 2013).

Constitucional Patriotism dezenvolve ho prepozisaun ida katak unidade ho baze simbolizmu ema ida-idak-nian ka iha realidade simbóliku grupu-nian só kontribui de’it ba repetisaun istória hosi sistema tradisionál-sira Alemaña-nian. Habermas fó referénsia hosi esperiénsia nasaun-sira Europa nia susesu. Habermas dehan nasaun-sira hosi kontinente Europeia susesu tanba adopta posibilidade ba modelu lejitimidade-foun liuhosi formasaun integrasaun sosiál ida-ne’ebe abstratu. Habermas hateten katak duké preokupa atu hetan konsensu kona-ba valór sira justisa-nian, nia haree katak sosiedade modernu prioritiza konsensu kona-ba adopta sistema ida ho nia prosedimentu legál ne’ebé lejítimu ba viabiliza ezersísiu podér polítiku.

Jan-Werner Muller (2007) iha obra sientífika ho títulu: ‘A general theory of constitutional patriotism’ no obra ho títulu ‘Seven Ways to Misunderstand Constitutional Patriotism, 2009’) halo re-afirmasaun dala ida-tan dehan Constitucional Patriotism nu’udar pensamentu ida-ne’ebé afirma katak ema (sidadaun) sira tenki estabelese/forma lasu polítiku bazeia ba nórma no valór-sira hosi konstituisaun demokrátiku-liberál ida-ne’ebé pluralístiku, duké kesi-an ho kultura nasionál hanesan modelu komunidade kosmopolitania-sira.  Kwame Anthony Appiah (1997) iha nia obra sientífika ho títulu ‘Cosmopolitan Patriots’ define komunidade kosmopolitan refere ba ema-sira hosi étniku oin-oin, sira sai komunidade ida de’it ho morál inkluzivu, relasaun ekonomia eguál, estrutura sosiál polítika kobre étniku-sira hotu, sira fiar iha relasaun amizade ida metin maski sira mai ho ida-idak nia karaterístiku étniku, rasa, fiar ka relijiaun, polítiku, nsst.

Justine Lacriox (2002) iha obra ho títulu: For a European Constitutional Patriotism’, hateten katak re-formulasaun identidade ho baze grupu-centrismo no identifikasaun etno-kulturál ema ida-idak nian tenke liuhosi meiu harii / estabelese kompromisu koletivu iha ámbitu Estadu-Nasaun ne’ebé karateriza ho mundu modernizasaun no globalizasaun. Estadu-Nasaun sira kompostu hosi grupu étniku no kulturál oin-oin sai nu’udar sidadaun. Ezemplu ida-ne’e hatudu iha esperiénsia dezenvolvimentu nasaun sira Europeia no nu’udar odamatan ba forma nasaun-sosiedade Europa Koletiva ida (Europaizmu) no unidade supra-nasionál Europa-nian agora.

Dezenvolvimentu pensamentu sientífiku Constitutional Patriotism Habermas nian ne’e tama iha diskusaun no interpretasaun ne’ebé vária tebes. Sientista sira kontinua esplora no diskute konseitu, fornese prepozisaun no argumentu oin-oin. Sientista balun argumenta katak Constitutional Patriotism nu’udar konseitu foun-ida ba identifikasaun entidade supra-nasionál. Sientista balun fali argumenta katak Constitutional Patriotism ne’e foka liubá liberdade formasaun identidade grupu ho baze étniku (etnisidade). Seluk fali argumenta katak Constitutional Patriotism sai literatura ba estudu sidadania ka identidade tradisionál-sira ka konseitu ne’ebé uza hodi esplika sidadania ho diversidade identidade ‘hibriditas no sosiedade pluralístiku iha era mundiál modernu’.

Sientista balun fali argument, Constitutional Patriotism nu’udar konseitu ida-ne’ebé prodús hosi esperiénsia funu mundu-daruak, liuliu esperiénsia istória moruk-nakukun holocousto Alemaña-nian. Tanba ne’e, Constitutional Patriotism nu’udar protejedór no instrumentu Estadu-sentrál nian atu rezolve lasu-istória-moruk-holocausto ho terseira militante Reich-nian. Filózofu Liberál hanesan Karl Jaspers (1946) konsidera konseitu Constitutional Patriotism nu’udar instrumentu ba pensamentu konaba ‘Kulpa polítika koletiva hosi holocausto no meiu kona-ba responsabilidade koletivu-nian’.

Dolf Sternberger (1979) esklarese katak Constitutional Patriotism ne’e nu’udar instrumentu atu proteje no asegura estabilizasaun polítika, mantein (koidadu) paz-dame iha Alemãna Weste post funu mundu daruak-nian. Sternberger deskreve konseitu ida-ne’e nu’udar meiu sidadaun atu identifika sira an iha Estadu-Demokrátiku ida hodi halo auto-defeza hasoru ameasa sira hosi rai-laran (internál Alemaña) no rai-liur (esterna). Sternberger halo afirmasaun iha-ne’e katak konseitu Constitutional Patriotism ne’e refere ba defeza no protesaun Estadu-nian. Iha-ne’e, Sternberger similariza ho konseitu militánsia demokrátiku (militánsia Estadu Demokrátiku). Jan-Werner Müller (2006) iha obra ho títulu ‘On the Origins of Constitutional Patriotism”. Contemporary Political Theory’ hateten katak Sternberger adopta pensamentu filózofu Aristotelianizme, iha-ne’ebé tradisionalmente patriotism laiha relasaun ho sentimentu ba nasaun. Konseitu Constitutional Patriotism nu’udar espansaun ka esplorasaun hosi konseitu Staatsfreundschaft (amizade entre nasaun-sira).

III. Diskusaun no krítika hasoru Constitutional Patriotism Habermas-nian;

Hosi pontu-sira iha parte – II parágrafu anteriór-leten ne’e, ita bele deteta ona diferensa opiniaun hosi konseitu no argumentasaun sientista-sira nian. Sientista ida-idak mai ho sira-nia opiniaun, sira ida-idak define Constitutional Patriotism nu’udar konseitu foun ida ba identifikasaun entidade supra-nasionál, Liberdade formasaun identidade grupu ho baze étniku (etnisidade), nu’udar literatura ba estudu sidadania ka identidade tradisionál-sira, pensamentu kona-ba ‘Kulpa polítika koletiva no meiu kona-ba responsabilidade koletiva-nian’.  Embora Habermas rasik, Sientista Dolf Sternberger  no Jan-Werner Muller nu’udar sientista ne’ebé defende Constitutional Patriotism ne’e.

Iha diskusaun tuirmai iha parte II (rua) publikasaun ne’e, ha’u sei kontinua esplora-tan diskusaun ka debate-sira atuál no krítika (recent critiques) hasoru Constitutional Patriotism ne’e ba leitór sira. Liuliu hanesan ho ha’u-nia intensaun ba alin Foinsa’e Universitáriu-sira ne’ebé interesante ho Pensamentu Constitutional Patriotism ho konseitu sira seluk Jurgen Habermas-nian. (Sei kontinua….!)

Leitura tuirmai Lee iha:

  1. On the Origins of Constitutional Patriotism Jan-Werner Mu¨ller Department of Politics, Princeton University, Corwin Hall, Princeton, NJ 08544-1012, USA).
  2. Constitutional Patriotism (Vito Bred – IVR Encyclopaedia of Jurisprudence, Legal Theory and Philosophy of Law, M.N.S. Sellers and S. Kirste. Springer , Dordrecht,  2017 10.1007/978-94-007-6730-0_221-1).

Hakerek nain nu’udar Traballadór Fakuldade Siénsia Sosiál – Universidade Nasionál Timor Lorosa’e (UNTL)

Enderesu eletroniku: hatoudoana@gmail.com

HAKEREK NO HATÁN

Please enter your comment!
Please enter your name here