Primeiru-Ministru, Taur Matan Ruak. Imajen Tatoli/Egas Cristovão

DILI, 27 maiu 2020 (TATOLI) – Primeiru-Ministru (PM), Taur Matan Ruak husu ba públiku atu pasiénsia hein subsídiu $100 kada fulan ba uma-kain durante implementasaun Estadu Emerjénsia, ne’ebé Governu promete ona atu fó, tanba daudaun ne’e ekipa tékniku sira esforsu hela iha parte administrasaun no regra legál sira.

“Ita iha difikuldade téknika no mós difikuldade prosesuál administrativa nian kona-ba ita nia lei sira, klaru katak Governu servisu maka’as loos tuir kompeténsia Governu nian atubele hadi’a no ultrapasa hodi bele fasilita implementasaun no ida ne’ebé labele Governu sei husu apoiu ba Parlamentu Nasionál”, hateten PM Taur Matan Ruak iha Parlamentu Nasionál (PN), kuarta ne’e.

Xefe Governu afirma, medida sira ne’e sei implementa tanba ne’e hanesan promesa Governu.

“Iha ona planu no orsamentu ne’ebé sei implementa. Importante mak populasaun sira labele hein bebeik bainhira mak $100 ne’e mai, dalaruma nia to’o mai ita la sente, ne’ebé lalika sibuk”, PM argumenta.

Notísia Relevante: Governu Aloka Millaun $63,6 ba Pagamentu Subsídiu Uma-Kain Hamutuk 318.302

Kona-ba bainhira mak bele realiza pagamentu ba subsídiu refere, eis Prezidente Repúblika ne’e dehan sei akontese iha tempu badak maibé presiza pasiénsia.

“Sira kuandu hamlaha Governu mak sala, sira kuandu servisu laiha Governu mak sala, sira mate Governu mak sala, sira sala laiha, sira anju hotu. Tan ne’e, ha’u la promete loron ba sira maibé sei to’o, presiza pasiénsia oituan”, nia salienta.

Entretantu, iha loron 25 maiu, Governu liuhosi Konsellu Jestaun Fundu COVID-19 fiksa ona orsamentu hamutuk millaun $63,6 hodi fó subsídiu ba uma-kain hamutuk 318.302 iha Timor-Leste.

Ho montante ne’e, kada uma-kain sei hetan pagamentu ba fulan-rua hamutuk $200.

Antes ne’e, iha loron 23 abríl, Governu liuhosi reuniaun Konsellu Ministru estraordinária, aprova proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia ligadu ho surtu COVID-19 iha Timor-Leste.

Ema sira maka sei sai nu’udar benefisiáriu maka agregadu familiár sira ne’ebé kompostu husi pelumenuz sidadaun ida, ne‘ebé rejista ona to’o loron 31 marsu 2020 iha Livru Rejistu ‘Uma Kain’ no iha família ne’e nia laran, nia elementu ida kada fulan no simu osan la boot liu husi $500.

Apoiu ne’e hamutuk $100 kada fulan ba agregadu familiár no pagamentu sei halo iha fulan-maiu nia-laran, hafoin aprova diploma ida-ne’e no kustu hotu sei finansia husi Fundu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here