Primeiru-Ministru, Taur Matan Ruak, hamutuk ho Membru Governu no ekipa CIGC diskute pedidu renovasaun deklarasaun EE husi Prezidente Repúblika, iha Sala Plenáriu PN, kuarta (27/05). Imajen Tatoli/Egas Cristovão

DILI, 27 maiu 2020 (TATOLI) – Liuhosi diskusaun iha Sala Plenáriu, Koordenadór Administrasaun no Finansa Sala Situasaun Sentru Integradu Jestaun Krize (CIGC, sigla portugés), Dionísio Santos, relata to’o loron 20 maiu Governu ezekuta ona orsamentu hamutuk millaun $6,7 ba prevensaun surtu COVID-19 iha Timor-Leste.

“Hafoin Parlamentu Nasionál aprova orsamentu COVID-19, Governu konsege ezekuta orsamentu $451.000, hodi nune’e bainhira tau hamutuk hosi Fundu Rezerva Kontijénsia no husi fundu COVID-19 nian maka totál hamutuk millaun $6,7. Fiar katak númeru ne’e sei sa’e tan ona to’o millaun $6,8”, relata Koordendór ne’e iha ámbitu debate pedidu Prezidente Repúblika ba renovasaun deklarasaun Estadu Emerjénsia (EE) ligadu ho prevensaun COVID-19, kuarta ne’e.

Notísia Relevante: KM Aprova Dekretu-Lei Regula Fundu COVID-19 Millaun $150

Nia subliña, antes aprovasaun orsamentu ba Fundu COVID-19, Governu asesu ona osan iha Fundu Kontijénsia hodi fasilita Ministériu Saúde (MS) ba preparasaun  hasoru pandemia, ne’ebé kompostu hosi millaun $6,2 hodi fasilita MS hodi halo akizisaun ba ekipamentu médiku liuhosi Organizasaun Mundiál ba Fundu Infánsia (UNICEF, sigla inglés) hamutuk millaun $5,7 no akizisaun seluk ba ekipamentu ne’ebé liuhosi Programa Nasionál Nasaun Unida ba Dezenvolvimentu (PNUD, sigla portugés).

Dionísio Santos refere konaba-ba ekipamentu ne’ebé sosa liuhosi UNICEF nian Governu simu tiha ona, enkuantu husi PNUD nian sei to’o iha fulan ne’e nia laran.

Tuir Koordenadór ne’e, parte operasaun Sala Situasaun nian antes ne’e konsege simu orsamentu husi Fundu Rezerva kontizensia hamutuk $50.000 hodi bele fasilita operasaun iha Sala Situasaun durante períodu EE no surtu COVID-19.

Nia realsa, orsamentu ne’ebé gasta bazeia ba programa ne’ebé dezeña no objetivu jerál ne’ebé fó sai ona ho ninia alvu sira atinje ona maka husi sub-programa ne’ebé identifika kazu COVID-19 to’o deteta.

“Ida maka reforsa atividade epidemiolojia ne’ebé konsege gasta ona $100.000 resin, iha mós gastu ba atividade operasionál Sala Situasaun nian maka 350.000. Totál Fundu COVID ne’ebé ezekuta ona la inklui Fundu Rezerva maka $450.000. Ezekusaun ba orsamentu sira ne’e mak atinje ona rezultadu sira ne’ebé iha”, nia salienta.

Antes ne’e, iha loron 2 abríl, Parlamentu aprova orsamentu millaun $250 no iha loron tuir mai, sesta (03/04), haruka ba Prezidente Repúblika, Francisco Guterres ‘Lú Olo.

Nune’e, iha loron 6 abríl, Prezidente Repúblika promulga Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha PN, millaun $150 sei aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no husi millaun $150 ne’e, aloka $500.000 ba Parlamentu atu dezenvolve polítika no programa iha ámbitu prevensaun no kombate surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here