Xefe Bankada CNRT, Duarte Nunes. Imajen/Egas Cristovão

DILI, 27 maiu 2020 (TATOLI)—Bankada Congresso Nacional da Reconstrução de Timor (CNRT) no União Democrática Timorense (UDT) propoin Governu aplika de’it medida emerjénsia hasoru propagasaun Covid-19 no la presiza ona deklara Estadu Emerjénsia (EE).

“Laiha razaun atu fundamenta estende Estadu Emerjénsia. Ita bele halo de’it medida emerjénsia atu prevene transmisaun COVID-19 ba ita-nia komunidade sira,”  haktuir komunikadu imprensa ne’ebé Agência TATOLI asesu, kuarta ne’e.

Sekretáriu Jerál no Atual Deputado (UDT), Francisco David Xavier Carlos. Imajen/ Egas Cristóvão

Komunikadu imprensa ne’e asina hosi Xefe Bankada CNRT, Deputadu Duarte Nunes no Xefe Bankada UDT/FM, Francisco David Xavier Carlos.

Bankada CNRT no UDT/FM konsidera Governu konsientemente uza Estadu Emerjénsia (EE) COVID-19 hodi halo manobra polítika oin-oin, inklui ohin husu tán renovasaun EE ba dala-rua hodi estende EE ba fulan-tolu ho intensaun hakarak atu hametin sira-nia podér ne’ebé hetan hosi dalan ilegál no inkonstitusionál.

Bankada CNRT ho nia-aliadu sira la partisipa iha plenária PN maibé manifesta nia pozisaun relasaun ho estensaun EE mak hanesan tuir mai ne’e:

  1. COVID-19 pandemia importadu, laiha transmisaun lokál. Desizaun taka fronteira, aeroportu no portu hatudu ona redusaun kazu suspeitu COVID-19 loron-loron. Timor-Leste halo ona esforsu hotu-hotu, lokalizasaun suspeitu iha kuarentena no izolamentu. Tanba-ne’e, iha loron 02 fulan-abríl Parlamentu Nasional aprova fundu própriu millaun $150 ba polítika prevensaun hodi sulan povu tomak iha de’it uma, halo “lockdown” ba territóriu tomak, objetivu mak pandemia ne’e labele da’et ba ema seluk, labele daet ba família no komunidade sira.
  1. Bainhira Prezidente-Repúblika propoin primeira estensaun ba EE, ami vota kontra ho razaun katak la presiza estende EE maibé promove de’it lei ida hodi taka de’it fronteira no halo restrisaun limitadu ba movimentu populasaun atu nune’e labele lori konsekuénsia negativu barak ba povu.

Efeitu negativu hosi lockdown, povu barak hamlaha, hein atu governu buka rezolve maske governu loron-loron mai ho promesa mamuk $100 dolar. Ohin, EE atu tama tán ona iha terseiru-períodu, tama ba fulan-tolu sein prezensa Estadu iha povu nia leet, povu falta hahaan, joven barak lakon nia servisu nune’e mós setór negósiu informál barak mak taka.

Nune’e mós, akizasaun ekipamentu ne’ebé Governu halo liuhosi UNDP ho montante osan hamutuk millaun $5 la’o tarde liu, to’o ohin loron seidauk to’o mai maski Governu selu hotu ona. Ita hatene katak pandemia COVID-19 redús ba beibeik no agora dadauk laiha pasiente COVID-19. Ida-ne’e hatudu katak, ekipamentu ne’ebé governu sosa ho osan boot ne’e, “karik” sei to’o iha Timor-Leste, depois rai de’it ona iha armajen tanba la uza.

  1. Se mak hetan benefísiu boot hosi estensaun EE ida-ne’e, ami haree momoos katak, kamada sosiál kiik mak hetan aproveitamentu boot. Enkuantu iha sorin seluk, kamada sosiál boot, povu maioria falta ai-haan. Bankada CNRT ho nia aliadu-sira lamenta tebes ho estensaun Estadu Emerjénsia tanba povu kiik lakon servisu, tanis no hamlaha, moris terus no hein laran luak hosi maluk sira seluk nia karidade.
  1. Implementasaun EE daruak la’o la tuir ona regra EE nian, ne’e tanba polítiku sira duni mak lakohi atu kumpre. Polítiku sira uza EE hodi sukit-malu no asalta podér. Situasaun ida-ne’e preokupante, ami deskobre katak EE sai nu’udar meiu de’it ba Governu ne’ebé forma hosi aliadu ilegál sira hodi buka hadau no atinze sira-nia interese polítiku ba podér.
  1. Bankada Fretilin hamutuk ho PLP no KHUNTO, aproveita EE halo asaltu podér no harahun koligasaun ne’ebé halo ona esforsu formál hotu-hotu tuir orientasaun Prezidente Repúblika nian. Maske ikus mai Prezidente Lú Olo fó de’it resposta ba grupu golpista sira hodi dekreta orgánika governu foun iha ámbitu VIII governu nian.
  1. Violasaun grave no klara hasoru RDTL, ita-hotu sempre rona Prezidente Lú Olo dehan, “ema hotu-hotu tenke kumpri Konstituisaun no Lei sira”, maibé nia rasik la kumpri nia juramentu, inklui nia partidu rasik organiza asalta podér iha Parlamentu Nasionál.

“Atu termina, ami halo daudaun ona rekursu ba Tribunál ba aktus hotu-hotu ne’ebé Fretilin, PLP no KHUNTO halo hodi hadau meza Parlamentu Nasional. Enkuantu seidauk iha desizaun ne’ebé justu, deputadu CNRT ho nia-aliadu sira sei la tuir actividade hotu-hotu ne’ebé prezide no organiza hosi Presidente PN illegal,” komunikadu imprensa ne’e haktuir.

 Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here