Diretór Operasaun AIFAESA.IP, Gabriel da Costa. Imajen Tatoli/Egas Cristovão

DILI, 27 maiu 2020 (TATOLI) – Diretór Operasaun Autoridade Inspesaun no Fiskalizasaun Aktividade Ekonomia no Sanitária (AIFAESA), Gabriel  da Costa, informa iha tempu badak ekipa AIFAESA sei desloka ba munisípiu atu kontrola folin nesesidade bázika iha loja sira.

“Ami hetan reklasaun durante implementasaun períodu Estadu Emerjénsia daruak ne’e husi munisípiu hanesan Baucau, Lospalos inklui Rejiaun Administrativa Oé-cusse Ambeno (RAEOA). Tanba ne’e karik iha semana ne’e ami sei desloka ba munisípiu sira hodi halo kontrolu”, dehan Dirijente ne’e ba Agênsia Tatoli, iha ninia knaar fatin, Matadoro, kuarta ne’e.

AIFAESA simu keixa katak loja sira hahú inventa folin nesesidade bazika, tanba ne’e ekipa operasaun AIFAESA sei desloka atu haree presu iha estasiomentu sira.

“Tuir keixa katak kontinua fa’an foos ho folin a’as, liuliu iha Munisípiu Baucau ne’ebé identifika ona katak iha loja balun fa’an nesesidada bázika ho folin a’as”, Diretór ne’e akresenta.

Nia adianta, parte AIFAESA sei haree kestaun hirak ne’e tanba iha situasaun Estadu Emerjénsia no surtu COVID-19 ne’e la fó oportunidade ba kualkér operadór ekonomia atu hasa’e folin sasán.

”Kuandu ami hetan negosiante balun hasa’e folin, ami no parte polísia sei koordena hodi halo prosesu auto-notísia no sei submete ba Ministériu públiku tanba konsidera hanesan krime”, nia subliña.

Jornalista: Natalino Costa   

Editora: Julia Chatarina

HAKEREK NO HATÁN

Please enter your comment!
Please enter your name here