Entrega sasán husi PERTAMINA ba RAEOA, iha edifísiu ZEESM,TL, Faról, tersa (26/05). Imajen Tatoli/Egas Cristovão

DILI, 26 maiu 2020 (TATOLI) – PERTAMINA International Timor, SA, fó apoia sasán nesesidade bázika no tanki bee ida ba Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM,TL).

Sasán sira ne’e entrega simbolikamente husi Embaixador Indonézia iha Timor-Leste, Sahat Sitorus no Diretór Ezekutivu PERTAMINA International Timor, SA, Beny Harto Wijaya, ba Prezidente Autoridade RAEOA-ZEESM, José Luís Guterres ‘Lugu’.

Embaixadór Sahat Sitorus hateten apoia ne’e hodi naran nasaun Indonézia nian liuhosi PERTAMINA hodi fahe ba povu Oé-cusse relasiona ho surtu COVID-19.

Embaixadór Indonézia ihaTimor-Leste, Sahat Sitorus. Imajen Tatoli/Egas Cristovão

“Ita hasoru problema Coronavírus, tanba ne’e ita labele servisu no laiha osan hodi sosa sasán. Tanba ne’e, ami hamutuk ho PERTAMINA hakarak fó ajudu nesesidade bázika no tangki bee hodi fase liman tuir regulamentu ne’ebé estabelese ona husi Governu, hodi halo prevensaun ba COVID-19. Agradese mós ba Prezidente Autoridade tanba bele fó ona oportunidade ba ami hodi fahe k’solok ne’e ba povu Oé-cusse”, dehan diplomata ne’e iha ámbitu entrega simbolikamente iha edifísiu ZEESM, Farol, tersa ne’e.

Sorin seluk, PERTAMINA International Timor, SA, Beny Harto Wijaya, realsa PERTAMINA iha Timor-Leste aleinde halo negósiu, empreza ne’e mós iha interese hodi fó apoia ba povu Timor-Leste, liuliu iha situasaun surtu COVID-19.

Diretór Ezekutivu PERTAMINA International Timor, SA, Beny Harto Wijaya. Imajen Tatoli/Egas Cristovão

“Ami konsidera povu Timor-Leste hanesan ami-nia maluk mós, tanba ne’e ami hakarak fó apoia nesesidade bázika. Ha’u rasik senti kontenti tebes tanba iha Timor-Leste la rejista ona COVID-19, ne’e di’ak tebes”, nia akresenta.

Prezidenti Autoridade Lugu agradese tebes ba apoia no promete sei lori sasán sira ne’e ba RAEOA hodi fó ba populasaun ne’ebé presiza tebes.

“Sasán sira ne’e ami sei lori ba povu Oé-cusse ne’ebé k’biit laek, enkuantu tangki bee atu hanorin nafatin no hodi hatoman-an kumpre medida sira ne’ebé iha. Ida ne’e di’ak tebes no ami agradese tebes ba iha Embaixada Indonézia no PERTAMINA inklui funsionáriu tomak. Hein katak ho jestu ida ne’e bele kontinua nafatin relasaun nasaun rua ho di’ak”, Lugu subliña.

Entretantu, nesesidade bázika sira ne’ebé oferese maka hanesan foos, mina ba tein, no sasán seluk tan, inklui tanki bee ida.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here