Prezidente Autoridade RAEOA-ZEESM TL, José Luís Guterres ‘Lugu’. Imajen Tatoli/Egas Cristovão

DILI, 26 maiu 2020 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM,TL), José Luis Guterres ‘Lugu’, hateten nia parte prontu sai husi RAEOA maski mandatu seidauk ramata, maibé sai ho laran triste tanba sei hakarak atu serví povu Oé-Cusse.

Lugu ne’ebé seidauk kompleta mandatu tinan ida, hetan pose husi Primeiru-Ministru, Taur Matan Ruak, iha loron 13 novembru 2019 ba mandatu tinan-lima.

Nia admite, daudaun ne’e nia seidauk simu karta ofisiál husi Xefe Governu atu termina ninia mandatu, maibé nia parte rona ema barak maka ko’alia ona kona-ba asuntu ne’e.

“Ha’u bele dehan katak karik ha’u sai, ha’u sai ho laran triste, bele manan osan iha fatin barak di’ak liu maibé ohin loron ha’u kuandu haree ona situasaun iha ne’ebá ha’u kala sai ho fuan moras, maibé vida mak ne’e, laiha problema”, hateten Lugu iha edifísu  ZEEMS,TL, Farol, tersa ne’e.

Notísia Relevante: Hetan Pose, Prezidente RAEOA Foun Promete Sei Rezolve Kestaun Bázika Moris Populasaun

Eis Ministru Negósiu Estranjeiru no Kooperasaun ne’e dehan, nia prontu atu sai tanba hetan nomeasaun husi Xefe Governu atuál, tanba ne’e bainhira deside hasai tanba dinámika polítika, nia parte prontu koopera.

“Ha’u ba Oé-Cusse tanba desizaun maihusi Primeiru-Ministru no tuir lei ne’ebé iha mandatu ne’e tinan lima, maibé iha polítika ita hotu tenke preparadu katak buat hotu bele muda”, nia rekoñese.

Nu’udar timor-oan, nia prontu submete ba desizaun husi Governu Sentrál, maski oportunidade ne’ebé fó ba nia la to’o rohan.

“Ha’u hein kuandu Primeiru-Ministru dehan tempu to’o ona atu ema seluk ba fali RAEOA, hanesan timor-oan tenke simu buat ne’ebé Governu deside, maibé ha’u bele dehan katak ha’u haree terus ferik-katuas no oan-kiak sira iha Oé-Cusse, ha’u sei sai karik ha’u nia laran moras tanba ha’u laiha ona oportunidade atu serví povu Oé-Cusse. Maibé oportunidade ne’e la to’o rohan, sente triste maibé tenke simu desizaun saida de’it hosi Governu”, Lugu salienta.

Lugu hetan pose bazeia Proposta Rezolusaun Governu ne’ebé aprezenta husi Xefe Governu no hetan aprovasaun liuhosi reuniaun Konsellu Ministru iha loron 6 novembru.

Antes ne’e, Marí Alkatiri ramata ninia mandatu nu’udar Prezidente Autoridade RAEOA-ZEESM iha loron 30 jullu 2019 no kontinua hosi Prezidente Autoridade Interinu, Arsénio Paixão Bano durante loron 120, hahú hosi 1 agostu 2019.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here