PGR José da Costa Ximenes. Imajen/Egas Cristovão

DILI, 26 maiu 2020 (TATOLI) – Kontratasaun públika ne’ebé ladún iha fiskalizasaun di’ak bele tau kauza no fó prezuiju ba estadu.

Lia hirak ne’e hato’o husi Prokuradór Jerál Repúblika (PGR, sigla portugés), José Ximenes, ba jornalista sira hafoin enkontru ho Primeiru-Ministru (PM), Taur Matan Ruak, iha Palaçio do Governo, Dili, tersa (26/05/2020).

PGR José Ximenes esplika, area kontratasaun públiku sai risku boot tebe-tebes tanba ladún iha fiskalizasaun didi’ak bele tau kauza prejuizu ba estadu ne’ebé liga ba serbisu kontensiozu estadu ninian dalaruma ema pesoál no koletivu halo asaun kontra estadu.

Nia dehan, fiskalizasaun ba kontratu sira barak mak mosu tráfiku influénsia para mosu krime partisipasaun ekonómiku no negósiu ho krime korrupsaun.

“Ami hanoin katak iha area kontratasaun públika kuaze ministériu hotu-hotu sai hanesan problema,” hateten PGR José Ximenes.

Liuhusi enkontru ho PM Taur, PGR José Ximenes, husu ba xefe governu oinsá bele fó apoiu hodi forma ka kria gabinete ida ne’ebé hodi halo koordenasaun ba liña ministériu hotu hodi haree serbisu kontajiozu no oinsá bele mós fó informasaun ba Ministériu Públiku di’ak liu tan.

Iha enkontru ne’e mós parte-rua ko’alia kona-ba mandatu husi membru Konsellu Superior Ministériu Públiku ne’ebé dezigna husi governu termina ona iha fulan hirak liu-ba.

Konsellu Ministru, foin lalais, nomeia ona membru foun Konsellu Superior Ministériu Públiku, hanesan Timóteo de Jesus ho Ana Paula, maibé to’o agora seidauk públika iha Jornál Repúblika.
Tanba ne’e, PGR José Ximenes, hateten, bainhira públika ona iha Jornál Repúblika membru foun bele hahú partisipa reuniaun konsellu superior hodi hola desizaun ruma.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here