Imajen:Facebook

DILI, 26 maiu 2020 (TATOLI)-Médiku Jerál husi Sala Sirúrjia Ospitál Nasionál Guido Valadares (HNGV-sigla portugés), Cesaltina da Costa, informa vítima Evaristo da Silva ne’ebé ema deskoiñesidu hana ho rama ambon iha Kampung-Alor, iha segunda (25/05/2020) kalan ne’e, ninia kondisaun saúde hahú di’ak.

Nia dehan vítima evakua ba HNGV mazumenus tuku 20:00 Otl, no daudaun ne’e baixa hela iha sala sirúrjia feto nian hodi hetan tratamentu saúde husi médiku sira.

“Ema deskoiñesidu hana ho rama ambon ne’e kona iha ninia pulmaun parte karuk nian,” katak Nia ba TATOLI, via telefone, tersa ohin.

Kondisaun saúde pasiente en-jerál iha ona faze rekuperasaun tanba dada iis la moras ona.

“Laiha impaktu ba nia isin lolon maibé, ba liu nia pulmaun maibé ami tenta rezolve ona kanek ne’ebé mak vítima ne’e hetan, tanba ami tau dreinajen ne’e ba parte pulmaun karuk nian para bele hasai anin no raan maten sira iha nia isin lolon,”tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here