Komunidade sira ajuda normaliza eletrisidade. Imajen/Espesiál

DILI, 26 maiu 2020 (TATOLI) – Komunidade iha Aldeia Chauluturo, Suku Fuiloro, Postu Administrativu Lospalos, ajuda tékniku Eletricidade de Timor-Leste (EDTL) Munisípiu Lautém hodi troka ai-rin eletrisidade ne’ebé tohar kauza husi dezastre naturál.

Liña eletrisidade ne’e hetan estragu hafoin inundasaun ne’ebé akontense iha loron 22 maiu hafoin udan boot akompaña ho anin, ne’ebé halo ai-kamii ida monu iha liña eletrisidade média tensaun no baixa tensaun iha Colégio Don Bosco Foiluro, ne’ebé afeta mós ba Aldeia Chauluturo labele asesu enérjia eletrisidade, nune’e iha loron 25 maiu maka tékniku sira konsege hadi’a hikas.

“Tékniku EDTL Lautém hetan ajuda husi Padre Salesianu Don Bosco Fuiluro no komunidade Aldeia Chauluturo, Postu Administrativu Lospalos Vila, Munisípiu Lautém hodi bele troka fali ai-rin ne’ebé hetan estragu no tesi ai-horis ne’ebé fó ameasa hela ba liña eletrisidade:, refere nota imprensa ne’ebé Agência Tatoli asesu, tersa ne’e.

Ho nune’e, Tékniku EDTL Munisípiu Lautém agradese ba apoiu tomak husi Padre Salesianu Don Bosco Fuiloro no komunidade Aldeia Chauluturo hodi normaliza eletrisidade hodi bele lakan normál filafali.

Antes ne’e, Ministru Obra Públika, Salvador Eugênio Soares dos Reis Pires, fó kedan orientasaun ba Diresaun Jerál Obra Públiku (DGOP, sigla portugés) no Unidade Jestaun Projetu (PMU, sigla inglés) hodi halo normalizasaun atu fasilita movimentasaun transporte públiku no privadu.

Ekipa tékniku husi DGOP no PMU kontinua halo indentifikasaun ba obra sira ne’ebé hetan estragu hodi halo estimasaun ba orsamentu no halo rekuperasaun.

Tuir Governante ne’e, obra ne’ebé grave liu mak ponte Weru-Koco iha Lautém no estrada dirasaun Manatuto-Natarbora inklui fatin balun, maibé daudaun ne’e ekipa hala’o ona normalizasaun.

Daudaun ne’e, DGOP no PMU aprezenta ona lokalizasaun no mapamentu ba estragu husi inundasaun no sei kontinua verifika dadus atubele kuantifika no bele avansa ba rekuperasaun iha tempu badak.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here